Te Sma No Taki Noti, dan Den E Feni En Bun
A BUKU Betrayal—German Churches and the Holocaust e taki na wan eerlijk fasi fu a prati di den kerki ben abi na a Nazisme. „Kresten ben gwenti fu horibaka gi a tirimakti dati”, a buku e fruklari, „èn moro furu fu den sma dati ben taki noti fu sori taki den no ben agri nanga a frufolgu di sma ben frufolgu den Dyu. Ini a tori disi, fu di den no taki noti, dan dati e fruteri wi furu.
Fu san ede meki sma di ben taki dati den na Kresten, ben lobi a Nazisme? A buku e fruklari dati „a fasi fa Hitler ben gebroiki wet fu abi makti na ini a Doisri libimakandra”, ben kori furu fu den. A buku e taki: „A no ben wani sma luku seks buku nanga seks kino, èn a ben wani tyari wan kaba kon na huru libi, purubere, homo-sekslibi, nanga den koni wroko fu disiten di a ’ben si leki takru sani srefisrefi’. So srefi a ben gi uma di ben kisi fo, siksi, noso aiti pikin, bronsu, solfru, nanga gowtu medari, èn na so wan fasi a ben gi den deki-ati fu tan du den sani di den ben gwenti fu du leki osowefi. Baka di a Kruderi fu Versailles ben poti a kondre na syen, dan Hitler kenki sani, fu di a tyari kon baka markitiki di fosi ben tiri a libimakandra. A ben seti so srefi wan srudati makti nanga a prakseri fu sori taki a kondre fu en ben bun moro leki tra kondre. Dati meki taki srefi moro furu fu den Kresten na ini Doisrikondre, ben kon si a Nazisme leki wan moro bun tirimakti.”
Wán grupu ben handri na wan heri tra fasi. A buku Betrayal e taki: „Kotoigi fu Yehovah ben weigri fu teki prati na a ogri di sma ben du nanga tranga, noso fu abi wan sani fu du nanga srudati makti.” A no ben abi misi, taki a sani disi ben tyari wan ogri-ati frufolgu kon tapu a pikin grupu disi, èn furu fu en memre ben poti na ini strafuman kampu. Toku trawan di ben taki dati den ben de bakaman fu Krestes, ben du noti fu sori taki den no ben agri nanga dati. A buku e taki moro fara: „Katoliksma nanga Protestantsma ben sori moro feantifasi na presi fu sori sari-ati gi den Kotoigi fu Yehovah. Den ben agri moro nanga den grofu markitiki fu Hitler na presi fu warderi a fasi fa den Kotoigi ben wani abi vrede.” A de seiker taki fu di den no ben taki noti, meki sma ben handri moro takru nanga den Kotoigi na ondro a Nazi tirimakti.
Ala di a e tan wan fayafaya yu-o-hari-yu-o-trusu sortu rol den kerki ben plèi na ini Nazi politiek afersi, toku a buku Betrayal e kari Kotoigi fu Yehovah „wan kerki grupu di ben weigri fu horibaka noso fu wroko makandra nanga a tirimakti.