„Wan Eksempre fu Wánfasi”

DATI ben de a nen fu wan artikel di ben tyari kon na doro na ini wan koranti fu a foto Indaiatuba, na ini São Paulo, na Brasyonkondre. Suma ben gi na eksempre? „Kotoigi fu Yehovah, di seti sani fu bow wan nyun ’Kownukondre zaal’, soleki fa den e kari den tempel noso den zaal fu den. Den e gi wan bun eksempre taki sma kan wroko makandra trutru na ini wánfasi. Sma no kan taki dati a no de so”, a skrifiman ben fruklari.

A wánfasi di de na mindri den Kotoigi fu Yehovah, de krin fu si na den sortu okasi disi. Fu dati ede na artikel ben fruklari: „A e naki na ati fu si taki mansma, umasma, nanga tini e wroko makandra nanga prisiri leki friwani-wrokoman, fu bow wan presi pe den kan kon makandra èn anbegi Gado.”

Kotoigi fu Yehovah e gi wan bun eksempre na ini tra sani tu. „Boiti taki den e studeri èn e begi, den e suku fu yepi sma di de srafu fu sopi nanga drug fu kenki a libi fu den. Den e sori sma tu san na wánfasi èn san na lobi”, na artikel e taki moro fara. Fa den e doro a marki disi? Den Kotoigi sabi taki te wan sma e leri san na a rai fu Bijbel èn te a e gebroiki en tu, dan dati e yepi en fu broko lusu fu takru gwenti. Dati na a reide fu san ede den e du muiti fu leri trawan den sani di den leri fu a Bijbel. Na artikel e sori na a kaba fu en taki na eksempre fu den Kotoigi fu Yehovah „na wan eksempre di seiker tra sma musu waka na baka”.

Den konmakandra fu den Kotoigi fu Yehovah opo gi a publiki èn sma no abi fu poti kolekte. Wi e gi yu wan waran kari fu go na wan Kownukondre zaal krosibei fu pe yu e tan.