Vrede na Heri Grontapu—Fa A Sa Kon?
A DE so taki dyonsro vrede sa de na heri grontapu? Furu sma ben abi a denki dati wan ten, ma now den no de seiker moro. Wan nyunsu di ben tyari kon na doro na ini a Daily Mail & Guardian fu Zuid-Afrika, e taki fu den tyalensi fu a tamara fu wi. A nyunsu e sori taki: „Den sani di sma ben taki na fesi 10 yari bifo nomo fu wan nyun seti na heri grontapu, na sani di no sa kon tru.”
Den skrifiman e taki fu a bribi di sma ben abi 10 yari bifo nomo, taki den sani dati ben o kon tru. Didyonsro a Kowru Orloku ben kon na wan kaba èn den bigi tirimakti no ben strei moro nanga makandra. Fu di a ben gersi taki wan nyun pisi ten ben bigin, meki furu sma ben fruwakti taki libisma now ben o du bun sani di ben o yepi fu puru pina nanga siki, èn den ben fruwakti tu taki libisma ben o seti den tori di abi fu du nanga a pori di grontapu srefi e kon pori. „A e sori now taki den sani dati di sma ben taki na fesi na wan dren di no sa kon tru”, a nyunsu e taki. „Nyun feti bigin na presi di wi pikinmoro no ben sabi srefisrefi; na heri grontapu, dei fu dei moro nanga moro sma e kon pôti. Now tu tra kondre de di abi nucleair fetisani. A barinen di den VN ben abi kisi pori, fu di den no du nofo fu lusu den furu problema di baka makandra miti libisma. Den sma di ben denki taki a libi na grontapu sa kon bun, e kon kisi wan heri tra denki fu a tori disi.
Sma di e studeri Bijbel sabi taki den sani di libisma e pruberi fu du noiti sa abi bun bakapisi dorodoro, awansi fa den bun. Fu san ede dati de so? Bika, soleki fa Bijbel e taki, „a heri grontapu e didon na ini a makti fu a godelowsuwan” (1 Yohanes 5:19). Grontapu no kan tron a Paradijs di Gado wani a tron, te a de ondro a makti fu Satan.
Toku, wi abi reide fu bribi taki a libi sa kon bun na grontapu. Yehovah Gado e pramisi taki a sa tyari vrede kon na heri grontapu, ma a no sa du dati fu di a e lapulapu a sistema fu sani disi, ma fu di a e tyari „wan nyun grontapu” kon pe „regtfardikifasi sa de” (2 Petrus 3:13). Iya, nanga yepi fu Gado en Kownukondre, a grontapu fu wi sa kenki kon tron wan koloku tanpresi pe vrede de èn pe a libi nanga a wroko di sa de fu du, sa tyari prisiri kon doronomo gi a heri libisma famiri di e gi yesi. Boiti dati, Gado e pramisi fu „puru ala watra na den ai, èn dede no sa de moro, no wan sari, no wan babari, no wan pen no sa de moro”. Den pramisi disi no e komoto fu den sani di sma e taki èn di no de seiker. Na presi fu dati, den gron na tapu a tru Wortu fu a Mekiman di no man lei.—Openbaring 21:4; Titus 1:2.