Den Kerki Sa Abi Wánfasi Heri Esi? — Waktitoren LIBRARY TAPU INTERNET

Den Kerki Sa Abi Wánfasi Heri Esi?

„Wi e si wan prenspari dei na ini a historia fu den kerki fu wi”, na so Christian Krause ben taki, di de presidenti fu a grupu fu Luther Kerki na heri grontapu. Na a srefi fasi, Paus Johannes Paulus II ben taki fu „wan heimarki na ini den furu muiti di du fu meki trutru wánfasi kon baka na mindri Kresten”.

Den sani disi ben taki fayafaya fu di den tu kerki disi ben poti den nen na ondro wan dokumenti tapu 31 oktober 1999 na Augsburg, Doisrikondre. Di den poti den nen na ondro a dokumenti dati, dan den ben sori taki den e agri nanga a fruklari di den ben meki kaba, taki den o wroko makandra. A fruklari dati abi fu du nanga a kerki leri di e sori fa sma kan kisi regtfardikifasi. Den ben teki a yoisti dei nanga a yoisti presi. Sma taki dati Martin Luther ben spikri den 95 idea fu en poti na tapu a doro fu a bigi kerki na ini Wittenberg, tapu 31 oktober 1517. Na so wan fasi, a ben bigin nanga a kenki di ben o abi leki bakapisi taki Protestant Kerki (tra Kresten kerki boiti Lomsu Kerki) opo. We, Augsburg na a presi pe den bakaman fu Luther ben pristeri den prenspari kerki leri fu den na ini 1530, en den ben kari en na Augsburg Fruklari. Fu di a Lomsu Kerki no ben erken a leri dati, meki wan kefalek bigi prati ben kon na mindri den Protestantsma nanga den Lomsusma di ben o muilek fu lusu srefisrefi.

Soleki fa sma e taki, dan a fruklari taki den o wroko makandra o de wan bigi yepi fu meki a kerki abi wánfasi baka. A fruklari sa man tyari wánfasi trutru? A no ala sma ben denki taki dati o pasa. Moro leki 250 sabidensiman fu kerki tori fu a Protestant Kerki ben poti den nen na ondro wan heri tra sortu papira, pe den e warskow den Protestantsma fu luku bun taki a Lomsu Kerki no e basi den. Wan sani di ben meki den Protestantsma atibron tu, na taki a Lomsu Kerki ben fruklari taki, spesrutu gi a yari 2000, sma ben o kisi pardon fu den sondu. Na a srefi sani disi ben meki pratifasi kon so wan 500 yari pasa. Na Augsburg Fruklari nanga den sani di den Lomsusma ben taki na a konmakandra fu Trente fu sori taki den no e agri nanga dati, abi krakti ete. Dati meki wi no kan taki kwetikweti dati wánfasi na mindri den sa kon oiti.

A pratifasi na ini Krestenhèit èn so srefi na agri di den no e agri nanga makandra, na wan moro bigi problema leki a sani di a fruklari di den poti den nen na tapu man lusu. Moro fara, wánfasi na mindri kerki e kon soso te den sani di den e bribi de fu feni trutru na ini Gado Wortu, Bijbel (Efeisesma 4:3-6). Wánfasi no e kon fu di sma e meki wan kruderi nanga makandra. Na presi fu dati, trutru wánfasi e kon te sma e leri èn e du san Gado e aksi fu den. „Ala pipel, fu den sei, sa waka ibriwan fu den na ini a nen fu en gado”, na so a profeiti Mika ben taki, „ma wi, fu wi sei, sa waka na ini a nen fu Yehovah, wi Gado, te ten di no skotu, iya fu têgo.”—Mika 4:5.

[Sma di abi a reti fu a prenki na tapu bladzijde 32]