„Wan Sani Di Musu Meki Ibriwan Sma Prisiri”
TUFALU na wan moi kondre di abi neigi pikin èilanti na a Stille Zuidzee. So wan 10.500 sma e libi na a kondre disi. Ma fu di den Kotoigi fu Yehovah di de drape e frustan taki Gado „wani taki ala sortu sma musu kisi frulusu èn kon kisi wan soifri sabi fu waarheid”, meki den ben angri fu abi Bijbel publikâsi na ini den eigi tongo (1 Timoteus 2:4). Disi ben de wan muilek sani, bika no wan-enkri wortubuku na ini a tongo dati ben de fu kisi. Na ini 1979, wan Kotoigi fu Yehovah di e dini leki zendeling na ini Tufalu ben teki a muilek wroko disi na en tapu. En nanga en wefi di ben tan drape nanga wan osofamiri fu Tufalu, ben leri a tongo, èn safrisafri den ben meki wan lijst nanga wortu fu a tongo dati. Na a pisi ten fu 1984, a Watchtower Bible and Tract Society of New York, Inc., ben tyari a buku kon na doro di nen Joe kan libi foe têgo na ini wan paradijs na grontapoe.
Dr. T. Puapua, di ben de fosi-minister fu Tufalu, ben skrifi wan brifi pe a ben sori taki a e warderi a Libi foe têgo-buku. A ben skrifi: „A buku disi na ete wan nyun èn prenspari ’gudu’ di Tufalu kisi. Unu musu breiti srefisrefi nanga a wroko di unu du — wan kefalek bun sani unu du fu tranga a yeyefasi fu den sma fu a nâsi disi. Mi sabi taki a nen fu a buku disi sa skrifi na ini a historia fu Tufalu te sma o taki fu buku di meki fu gi trawan leri. . . . A sani disi di unu du na wan sani di musu meki taki ibriwan sma prisiri.”
A lijst nanga den wortu di a sma di vertaal a buku ben poti kon makandra, ben yepi fu meki wan wortubuku na ini 1993 di e puru Tufalu wortu na ini Ingrisitongo. Dati ben de a fosi Tufalutongo-Ingrisitongo wortubuku gi ala sma na ini a tongo dati. No so langa pasa, a Nationale Talen Kommissie fu Tufalu ben aksi primisi fu gebroiki a lijst dati tu fu meki a fosi wortubuku na ini Tufalutongo srefi.
Sensi 1 yanuari 1989, ala mun A Waktitoren e kon na doro na ini Tufalutongo. Efu yu e leisi a tijdschrift disi na ini wan tra tongo, dan go na bladzijde 2 èn luku efu yu eigi tongo na wan fu den tongo na san ini den e tyari A Waktitoren kon na doro. Te yu e leisi en na ini yu eigi tongo, dan sondro tweifri dati o gi yu moro pisiri.