Wan Opticiën E Sai wan Siri
Wan Rosiatongo gemeente fu Yehovah Kotoigi seti na ini a foto Haifa na Israèl. San a muiti fu wan opticiën (wan sma di e luku sortu bril yu abi fanowdu) di e tan na ini a foto Lviv na Ukraini, abi fu du nanga a gemeente disi di de so wan 2000 kilometer moro fara èn so srefi omeni kondre pasa Ukraini? Disi na wan tori di e sori o prenspari den sani de di Bijbel taki na Preikiman 11:6: „Sai yu siri na mamanten èn no meki yu anu rostu teleki neti doro; bika yu no sabi pe disi sa abi bun bakapisi.”
A TORI fu wi e bigin na ini 1990. Na a ten dati Ella, wan yongu Dyu uma, ben libi na ini a foto Lviv. Ella nanga en famiri ben e seti sani fu froisi go tan na Israèl. Wan syatu pisi ten bifo den gowe libi Ukraine, Ella ben musu go na wan opticiën di ben de wan Kotoigi fu Yehovah. Na a ten dati, a wroko fu den Kotoigi fu Yehovah ben tapu na ini Ukraine. Toku, na opticiën teki na okasi fu prati nanga Ella a bribi fu en di komoto na Bijbel. Di na opticiën taigi en taki Gado abi en eigi nen, dan dati ben fruwondru Ella. A sani dati ben meki taki Ella ben wani sabi moro, èn a bakapisi ben de taki den ben abi wan moi Bijbel takimakandra.
Ella ben lobi a takimakandra sote taki a aksi na opticiën fu abi ete wan takimakandra nanga en a wiki baka dati, èn ete wan a wiki na baka. A ben wani sabi moro nanga moro, ma wan problema ben de. Heri esi a famiri ben o gowe libi a kondre fu go tan na Israèl. Ella ben musu leri so furu sani ete! Fu man leri so furu leki a ben man na ini a ten di ben tan abra, dan a aksi na opticiën fu studeri Bijbel nanga en ala dei, te leki a ten ben doro taki a ben o gowe. Ala di Ella no ben bigin wantewante fu studeri Bijbel di a doro na Israèl, toku a siri fu waarheid ben teki rutu na ini en ati. Na a kaba fu a yari, a ben e studeri Bijbel seryusu baka.
Feti ben broko na ini a Persische Golf, èn Irak bigin sutu raket go na tapu Israèl. Sma ben taki furu fu a tori disi. Wan dei di Ella ben de na ini wan wenkri, dan a yere san wan famiri ben taki. A famiri disi di ben froisi go na Israèl ben e taki Rosiatongo. Ala di ensrefi ben e studeri Bijbel ete, toku Ella waka go miti a famiri disi èn a prati a pramisi di Bijbel e gi fu wan grontapu pe vrede de, nanga den. Leki bakapisi fu dati, a granmama Galina, a mama Natasha, a manpikin Sasha (Ariel), nanga na umapikin Illana, den alamala bigin teki prati na a bijbelstudie fu Ella.
Sasha ben de a fosi sma fu a famiri di teki dopu — ala di furu tesi miti en. Ala di a ben e wroko heri bun na skoro, toku a no ben kisi primisi moro fu kon na skoro, fu di en Kresten konsensi ben tapu en fu teki leri fu tron wan srudati. (Yesaya 2:2-4). Ala studenti ben musu teki a leri dati. Na afersi fu Sasha go te na a Hei Krutu fu Israèl na ini Yerusalem. A Hei Krutu prèise Sasha èn a gi a skoro komando fu teki Sasha baka, so taki a ben man klari a skoroyari. A heri kondre ben sabi fu na afersi disi. Leki bakapisi fu dati, furu sma fu Israèl kon sabi a bribi fu den Kotoigi fu Yehovah.a
Baka di Sasha klari a middelbaar skoro nanga bun bakapisi, dan a go na ini a furuten diniwroko fu Kotoigi fu Yehovah. Now a e dini leki wan spesrutu pionier èn leki owruman na ini wan gemeente. Illana, a sisa fu en, tron wan furuten preikiman tu. A mama nanga a granmama fu den, na Kotoigi di teki dopu. A siri di na opticiën ben sai ben meki froktu ete!
Na a srefi ten, Ella ben tan gro na yeye fasi èn heri esi a ben e preiki oso fu oso. Na a fosi oso di a ben go, Ella miti Faina di ben komopo fu Ukraine no so langa ete. Faina ben e firi brokosaka dorodoro. Baka ten Ella kon sabi taki, wan syatu pisi ten bifo a ben kari na Faina en oso, na uma disi di ben firi so brokosaka, ben begi Gado: „Mi no sabi suma na yu, ma efu yu e yere mi, yepi mi.” A takimakandra di en nanga Ella ben abi, ben gi en deki-ati. Faina ben abi furu aksi èn a ben poti bun prakseri na den piki di a ben kisi. Baka wan pisi ten a kisi na overtoigi taki Yehovah Kotoigi e leri sma a waarheid fu Bijbel. A kenki a schema di a ben abi fu studeri na universiteit, so taki a ben man abi moro ten gi a gemeente èn gi a preikiwroko. Faina teki dopu na ini mei 1994. A tron wan pionier tu, ala di a e sorgu ensrefi nanga wan afudei computer wroko.
Na ini november 1994, Ella ben e teki prati na a preikiwroko, di wantronso a no ben firi bun. A go na ati-oso pe ondrosuku ben sori taki a ben abi wan sweri na ini en bere èn a sweri ben e brudu. Di mofoneti doro, a sali fu Ella ben de 7,2. Dati wani taki dati a ben lagi tumusi. Wan owruman na ini a gemeente fu Ella ben de fesiman fu a Ziekenhuiscontactcomité (ZCC) (A komte di abi kontakti nanga ati-oso te Kotoigi di siki abi problema nanga brudu tori). A fruteri den datra fu furu tra fasi fa den ben kan dresi sma, sondro taki den ben gebroiki brudu.b Na oparâsi di Ella kisi sondro brudu waka bun èn a kon betre baka krinkrin.—Tori fu den Apostel 15:28, 29.
A sani disi trutru ben naki na ati fu Karl, a datra fu Ella di e dresi umasma siki. A datra disi ben de wan Dyu di ben gebore na Doisrikondre. Dan a memre taki en papa nanga mama di ben tan na libi baka a Holocaust, ben sabi Kotoigi fu Yehovah na ini den strafuman kampu. Karl ben abi furu aksi. Ala di a ben abi tumusi furu fu du leki datra, toku Karl meki ten fu studeri Bijbel doronomo. A yari baka dati, a ben go na den Kresten konmakandra di e hori ala wiki.
San na a bakapisi fu a siri di na opticiën ben sai? Wi si kaba san pasa nanga Sasha nanga a famiri fu en. Ella na wan spesrutu pionier. En umapikin Eina di klari middelbaar skoro no so langa pasa, e bigin pionier tu. Faina e dini so srefi leki wan spesrutu pionier. Karl, a datra fu Ella di e dresi umasma siki, now na wan dopu Kotoigi èn wan dinari ini a diniwroko. A e prati Bijbel waarheid di abi a krakti fu dresi sma, nanga den siki sma di e kon na en èn nanga tra sma.
A pikin grupu fu sma di e taki Rosiatongo èn di ben froisi go tan na Israèl, ben bigin leki wan pisi fu a Haifa Hebrew Gemeente. Now a pikin grupu disi gro kon tron wan Rosiatongo gemeente di de fayafaya èn di abi moro leki 120 Kownukondre preikiman. Wán fu den sani di meki a gemeente gro, na fu di wan opticiën na ini a foto Lviv ben teki na okasi fu sai wan siri!
[Futuwortu]
a Fu kon sabi a tori disi moro fini, luku na Ontwaakt! fu 8 november 1994, bladzijde 12-15.
b Den Ziekenhuiscontactcomité e wroko gi Kotoigi fu Yehovah na heri grontapu. Den e yepi fu seti sani na mindri a siki sma nanga den ati-oso wrokoman. Den e fruteri sma tu fu tra sortu datra yepi di abi den gron tapu den moro nyun ondrosuku di sma du tapu a kontren fu dresi tori.
[Karta na tapu bladzijde 29]
(Efu yu wani si pe den sani disi skrifi, luku a tijdschrift)
UKRAINI
ISRAÈL
[Sma di abi a reti fu a karta]
Mountain High Maps® Copyright © 1997 Digital Wisdom, Inc.
[Prenki na tapu bladzijde 30]
Ella nanga en umapikin Eina
[Prenki na tapu bladzijde 31]
Wan grupu fu koloku Kotoigi di e taki Rosiatongo, na ini Haifa. Fu a kruktu-anusei go na a reti-anusei: Sasha, Illana, Natasha, Galina, Faina, Ella, Eina, nanga Karl