Den Kerki O Tyari Vrede Kon na Grontapu?

FU 28 AUGUSTUS te go miti 31 augustus 2000, moro leki 500 sma di ben teki presi gi 73 kondre ben kon makandra na New York City. Den ben miti makandra na den Verenigde Nâsi (VN) gi ’Wan Konmakandra fu Kerki Fesiman fu Tyari Vrede Kon na Grontapu na ini a Nyun Pisi Ten fu Dusun Yari’. Den fesiman ben teki presi gi furu bribi. Furu fu den ben weri edebanti, krosi di ben abi wan alanya kloru, edebanti di meki fu fowru wiwiri, noso langa blaka dyakti. Na den mindri yu ben abi sma fu a Bahai bribi, a Buda bribi, a Hindu bribi, na Islam, a Yaina bribi, a Dyu bribi, a Syinto bribi, a Sikh bribi, a Tao bribi, a Zoroaster bribi, nanga den kerki fu Krestenhèit.

Den sma di den kerki ben seni kon ben miti na den Verenigde Nâsi, den tu fosi dei fu a konmakandra di ben o hori fo dei langa. Ma den Verenigde Nâsi no ben orga a konmakandra disi; den no ben gi moni gi a konmakandra disi tu. Na presi fu dati difrenti organisâsi ben du dati. Ma toku, VN nanga den kerki fesiman ben taki o prenspari a de fu wroko makandra fu tyari wan kaba kon na pôtifasi, a desko di sma e desko tra ras, problema nanga a naturu, orloku, nanga den fetisani di sma e gebroiki fu kiri ipi-ipi sma.

Den sma di den kerki ben seni kon, ben poti den nen na ondro wan dokumenti di nen „Commitment to Global Peace” (A Sweri fu Tyari Vrede Kon na Heri Grontapu). A dokumenti disi e erken taki ogridu nanga orloku e pasa „son leisi na ini a nen fu kerki”. Ma toku a dokumenti e taki dati den sma di poti den nen na ondro ben sa „wroko makandra nanga den Verenigde Nâsi . . . fu meki muiti fu tyari vrede kon”. Ma no wan spesrutu bosroiti ben teki di ben sori fa den ben kan du dati.

Na a di fu tu dei, Bawa Jain, a sekretarsi-generaal fu a konmakandra ben fruklari na a kaba fu den bigin wortu fu en, taki wan tu yari na fesi a ben si wan prenki na den Verenigde Nâsi. A prenki ben sori wan man di langa moro leki a gebow fu a Sekretariaat fu den Verenigde Nâsi. A man disi ben naki na a gebow neleki a ben naki na wan doro. Na ondro a prenki ben skrifi: „Granman fu Vrede”. Mr. Jain ben taki: „A momenti di mi si [a prenki], a ben naki mi ati trutru. Mi ben aksi difrenti sma san [a] ben wani taki. Tide mi denki taki mi feni a piki. Taki unu alamala kon makandra dyaso leki kerki fesiman fu grontapu, e sori mi taki [disi] na a granman fu vrede di e naki na a doro fu den Verenigde Nâsi.”

Bijbel e sori wi wan heri tra sani. A e sori taki Yesus Krestes na a Granman fu Vrede. Na en o tyari vrede kon na heri grontapu. Vrede no sa kon fu di den politiek fesiman fu a grontapu disi noso den kerki fesiman e suku du dati, ma a sa kon nanga yepi fu Gado en Kownukondre. Na a Kownukondre disi — Gado en hemel tirimakti — o tyari a libisma famiri di e gi yesi na en kon na wán. A tirimakti disi sa meki tu taki sma sa du a wani fu Gado na grontapu.—Yesaya 9:6; Mateus 6:9, 10.