A „Ben Horidoro te na a Kaba”

NA INI wan video fu 1993 di den e sori nyun memre fu na edekantoro fu Yehovah Kotoigi, Lyman Alexander Swingle ben taki fa a ben e denki fu a dini di a ben e dini Yehovah: „Dede ala di yu e weri yu susu ete!”a

Brada Swingle di ben abi 90 yari ben du soifri san a ben gi trawan deki-ati fu du. A „ben horidoro te na a kaba” (Mateus 24:13). Ala di a ben siki, toku dridewroko 7 maart a ben kon na wan konmakandra di a Tiri Skin fu Yehovah Kotoigi ben hori. A ben de wan memre fu a Tiri Skin. A tudewroko baka dati, a situwâsi fu en ben kon moro takru èn tapu 14 maart, 4.26 yuru mamanten, datra ben taki dati a dede.

Tapu 5 april 1930 Lyman Swingle ben bigin wroko na a edekantoro fu Yehovah Kotoigi na ini Brooklyn, na New York. A ben wroko drape pikinmoro 71 yari. Biginbigin Lyman ben e wroko pe den ben e meki buku, baka dati na a drukkerij, èn a ben yepi so srefi fu meki na inki fu druk buku. Fu taki en leti, Brada Swingle ben wroko so wan 25 yari na a presi pe inki ben e meki. A ben wroko so wan 20 yari tu leki memre fu a Skrifiman Afdeling fu na edekantoro. Den lasti 17 yari fu en libi, a ben wroko na a afdeling fu a Genootschap di e sorgu gi moni afersi.

Lyman ben de wan sma di ben meki a Kownukondre fu Gado bekènti fayafaya. Di a ben de paspas na ini Brooklyn, dan a ben tan nanga Arthur Worsley na ini wán kamra. Makandra nanga Arthur a ben gwenti fu go nanga wan fu den boto fu Kotoigi na a Hudsonliba. Den ben e gebroiki yepisani fu taki moro tranga, èn den ben e pasa furu satra nanga sonde drape fu meki a Kownukondre boskopu bekènti na den foto nanga dorpu drape di ben de na syoro.

Brada Swingle ben gebore 6 november 1910, ini Lincoln, Nebraska, ma syatu baka dati na osofamiri ben froisi go tan na Salt Lake City, Utah. Drape na ini 1913, en papa nanga mama ben kon tron Bijbel Ondrosukuman, soleki fa den ben e kari Yehovah Kotoigi na a ten dati. Yari langa, na osofamiri Swingle ben e ontfanga èn e sorgu gi den takiman di ben e kon fu na edekantoro fu den Kotoigi na Brooklyn. Den man disi ben de leki bun eksempre gi Lyman. Ini 1923, di a ben de 12 yari, a ben sori taki a ben gi ensrefi abra na Gado fu di a teki dopu.

Baka di a dini moro leki 26 yari na ini Brooklyn leki wan brada di no trow, a libi fu en ben kon switi srefisrefi di a ben trow nanga Crystal Zircher tapu 8 yuni 1956. Den ben de leki Tara nanga Jantje èn makandra den ben e teki prati na a diniwroko te leki Crystal dede ini 1998. So wan dri yari na fesi, Crystal ben kisi wan berurtu so taki a no ben man waka moro srefisrefi. Lyman ben gi wan moi eksempre fu trutru lobi fu di ala dei a ben e yepi fu sorgu en. Disi ben naki na ati fu ala sma, spesrutu den wan di ben e si fa Lyman ben e pusu a rolsturu na wan lobi-ati fasi na a futupasi fu a birti fu den te Crystal ben e pristeri A Waktitoren nanga Ontwaakt! na sma di e waka pasa.

Brada Swingle ben de wan opregti sma di abi switifasi, san ben meki taki ala sma di ben sabi en ben kon lobi en. Neleki en papa nanga mama, a ben abi a Bijbel howpu fu libi nanga Yesus Krestes na ini a hemel Kownukondre, èn wi abi a dyaranti taki a howpu fu en kon tru now.—1 Tesalonikasma 4:15-18; Openbaring 14:13.

[Futuwortu]

[Prenki na tapu bladzijde 31]

Brada Swingle ben wroko so wan 25 yari na a presi pe inki ben e meki

[Prenki na tapu bladzijde 31]

Lyman nanga Crystal ben de leki Tara nanga Jantje