„Gado E Gi sma Trutru a Krutustrafu fu Bron na ini Hel?”
„Unu e studeri fu tron sabiman fu Gado tori?”
Joel nanga Carl no ben fruwakti na aksi disi. Den tu yonkuman na friwani wrokoman di e dini na a edekantoro fu Yehovah Kotoigi na ini Brooklyn, New York. Den ben e leisi buku ini wan buku wenkri di de krosibei fu a presi dati. Ala di Joel ben e ondrosuku den Bijbel wortulijst, dan Carl ben e fruteri en fu wan takimakandra di a ben abi nanga wan sma na ini a diniwroko. Di wan man di ben tanapu krosibei fu den ben yere wan tu fu den sani di den ben taki, dan a ben go na den.
A man no ben wani sabi trutru efu den ben e studeri fu tron sabiman fu Gado tori, ma a ben broko en ede nanga wan tra sani. A ben fruteri den: „Mi na wan Dyu, èn son wan fu den mati fu mi di de Kresten taigi mi taki mi o bron na ini hel, bika den Dyu ben weigri fu teki Yesus. Disi e trobi mi trutru. A no gersi wan eerlijk sani taki so wan strafu e kon fu wan lobi-ati Gado. Gado e gi sma trutru a krutustrafu fu bron na ini hel?”
Joel nanga Carl ben taigi na opregti man disi taki den na seryusu studenti fu Bijbel. Den ben sori en ini den Buku fu Bijbel taki den dedewan no sabi noti èn taki den e sribi nomo na ini dede, ala di den e wakti fu kisi wan opobaka. Fu dati ede meki den no e kisi pen noso pina na ini helfaya (Psalm 146:3, 4; Preikiman 9:5, 10; Danièl 12:13; Yohanes 11:11-14, 23-26). Na a kaba fu a takimakandra di ben teki 45 miniti, dan a man taigi Joel nanga Carl pe a e tan èn a ben wani sabi moro fu a tori disi.
Efu hel ben de wan presi fu faya pe sma ben e kisi skin-ati, dan wan sma ben o aksi oiti fu den seni en go drape? Ma toku a famiri-edeman Yob di ben winsi taki a ben kan kon fri fu den problema fu en, ben aksi: „Suma sa gi pasi taki disi pasa nanga mi, taki yu kan kibri mi na ini hel fu noti no pasa nanga mi, èn taki yu kan kibri mi te leki na atibron fu yu pasa?” (Yob 14:13, Douay Version). A de krin taki Yob no ben bribi taki hel na wan presi pe sma e kisi skin-ati. Na presi fu dati, a ben suku kibri drape. Dede na te wan sma no de moro. A hel di Bijbel e taki fu en na a grebi pe a heri libisma famiri e go.
Efu yu wani sabi moro fu san e pasa nanga wi te wi dede èn sortu howpu wi kan abi baka dati, dan wi e gi yu deki-ati na wan switi fasi fu du san skrifi na ondrosei.