Den E Gebroiki a Nen fu Gado na ini Centraal Afrika

A MORO bigi pisi fu den sma na ini Centraal Afrika e bribi na ini Gado. Den no e tweifri taki en na a Mekiman fu ala sani (Openbaring 4:11). Ma toku, neleki furu sma na tra presi, furutron den no e poti prakseri na a nen fu Gado srefi — Yehovah.

Sma na ini Centraal Afrika èn so srefi sma na tra presi fu grontapu e sori go na a nen fu Gado te den e taki na ini a Wi Tata Begi, „joe nem moe de santa” (Mateus 6:9, Njoe Testament Nanga dem Psalm). Ma wan heri pisi ten, wan tu sma nomo ben sabi a nen dati. Toku a preiki di den Kotoigi fu Yehovah ben preiki fayafaya na ini den yari di pasa, ben kenki a fasi fa sma e denki fu a gebroiki fu a nen fu Gado. Na ini a ten disi, a nen fu Gado de bekènti na ala sei èn na ini furu Afrikan tongo den e si en leki a nen fu Gado. Wan tu fu den tongo dati na Sulu (uJehova), Yoruba (Jehofah), Eksosa (uYehova), nanga Swahili (Yehova). Toku furu Bijbel vertaling na ini den tongo disi no e gebroiki a nen disi ete.

Wan bun vertaling di e gebroiki a nen fu Gado na a Bijbel na ini Sande, wan tongo di den e taki na ini son pisi fu a Republiek fu Centraal Afrika, Sudan, nanga a Demokrasia Republiek Kongo. Na ini a pisi dati fu grontapu, sma e gebroiki a nen fu Gado, ala di a fasi fa den e skrifi en na ini a mama tongo fu den na Yekova. Awansi sortu fasi sma e kari a nen fu Gado na ini a tongo di den e taki na ini a kontren fu den, toku a prenspari taki den e gebroiki a nen. Fu san ede? Bika „ibriwan sma di e kari a nen fu Yehovah, sa kisi frulusu”.—Romesma 10:13.

[Karta/​Prenki na tapu bladzijde 32]

(Efu yu wani si pe den sani disi skrifi, luku a tijdschrift)

SUDAN

REPUBLIEK FU CENTRAAL AFRIKA

DEMOKRASIA REPUBLIEK KONGO

[Sma di abi a reti fu a karta]

The Complete Encyclopedia of Illustration/J. G. Heck