Sani Di E Pori den Bon

NA INI Bijbel ten, sma ben e si bon leki warti sani di den ben kan abi. Fu gi wan eksempre, di Sara, a lobi wefi fu Abraham dede, dan Abraham bai wan pisi gron fu beri en. Wan kontrakti ben sori taki Abraham ben tron a nyun eiginari fu a gron disi èn so srefi fu den bon di ben de na en tapu.—Genesis 23:15-18.

Na ini a ten disi so srefi, sma e si bon leki tumusi warti sani, èn na heri grontapu sma nanga organisâsi e du muiti fu meki taki den busi no lasi gowe. A buku State of the World 1998 (A Situwâsi fu Grontapu), e taki: „Furu sma na ini den kondre na a noordsei fu grontapu e broko den ede nanga san o pasa nanga den busi na ini den waran kondre, ma kande den no sabi taki yoisti den busi na ini den eigi kowru kondre na den busi di no de bigi busi moro. Den busi disi na den wan so srefi di sma e pori moro leki ala tra sortu busi.” San de wan kefar gi den busi na ini den kondre di de na a noordsei fu Europa èn den wan di de na ini Noord-Amerika? Furu sma e taki dati den busi e pori fu di sma e koti den puru. Ma tra sani de tu di safrisafri e pori den bon, a wan baka a trawan, fu taki en so. San na den sani disi? A pori di sma e pori a loktu èn a swa alen di e fadon. Den sani disi kan swaki den bon safrisafri, èn leki bakapisi fu dati den kan kon siki moro makriki.

Someni tenti yari kaba, sabiman di e studeri a naturu, èn so srefi tra sma di e broko den ede nanga den busi, warskow libisma taki a de fanowdu fu sorgu taki a naturu no e pori. Na ini den yari di ben de na mindri 1980-1990, sabiman na ini Doisrikondre ondrosuku san a pori di a loktu e pori èn san a swa alen di e fadon, e du nanga grontapu. Den taki: ’Efu wi no e du noti, dan te a yari 2000 doro, sma sa man si den busi soso tapu owru fowtow èn na ini felem.’ Wi kan breiti taki te nanga now, so wan pori di ben taki na fesi, no pasa ete, fu di grontapu abi nofo krakti fu dresi ensrefi.

Ma te fu kaba, na Gado sa du a moro bigi wroko fu sorgu taki a naturu no e pori gowe. „A e nati den bergi komoto fu den kamra fu en na tapusei” èn „a e meki grun grasi gro gi den meti, èn prani fu a bun fu a libisma famiri.” Gado pramisi so srefi fu „pori den wan di e pori grontapu” (Psalm 104:13, 14; Openbaring 11:18). A sa de trutru wan tumusi moi ten te den sma di e libi na grontapu sa man nyan bun fu têgo fu wan grontapu di no doti!—Psalm 37:9-11.