„Mi Sa Si Yu na ini Gado En Kownukondre”

„Mi lobi mati! Rupert, tide mi kisi dedestrafu. Yu no musu sari. Mi e seni a brifi disi fu taki dati mi lobi yu èn so srefi ala sma na ini na oso. Mi sa si yu na ini Gado En Kownukondre.”

TAPU 8 yuni 1942, Franc Drozg skrifi den wortu disi syatu bifo den Nazi srudati sutu en kiri. Fu san ede den kiri en?

Soleki fa den papira na ini a Museum of National Liberation na ini a foto Marburg na Slovenia e sori, dan a smeti disi di ben abi 38 yari, ben weigri fu tron wan memre fu a Wehrmannschaft. Dati ben de wan Doisri srudatigrupu di ben de na ini Slovenia na a ten di Doisrikondre ben teki a kondre disi abra. Franc ben de wan Bibelforscher, noso wan Bijbel Ondrosukuman, soleki fa den sma na ini a kontren dati ben sabi Yehovah Kotoigi na a ten dati. A ben handri akruderi Yesaya 2:4, di a bosroiti taki a no ben o horibaka gi na orloku di den Nazi ben e feti, fu di a ben fruklari taki a ben de wan borgu fu a Kownukondre fu Gado.—Mateus 6:33.

Den sma fu a foto Ptuj pe Franc ben tan, ben sabi en leki wan man di ben e preiki a bun nyunsu fu Gado Kownukondre fayafaya (Mateus 24:14). Ala di a ben kisi fu du nanga furu problema, toku a ben tan preiki a bun nyunsu teleki den sroto en na ini mei 1942.

Furu Kotoigi fu Yehovah na ini Slovenia ben kisi hebi frufolgu fu den Nazi. Franc ben de wan fu den fosi sma dati di den kiri fu en bribi ede. Neleki den fosi yarihondro Kresten a ben kisi krakti fu den wortu: „Wi musu pasa furu banawtu fu go na ini a kownukondre fu Gado” (Tori fu den Apostel 14:22). A bribi di a ben abi taki a hemel tiri dati de trutru, ben de krin fu si na ini den lasti wortu di a ben taki: „Mi sa si yu na ini Gado en Kownukondre.”

[Sma di abi a reti fu a prenki na tapu bladzijde 32]

Franc Drozg: Photo Archive-Museum of National Liberation Maribor, Slovenia; a brifi: A trutru brifi de fu feni na ini a Museum of National Liberation Maribor, na ini Slovenia