„Yu sabi fu san ede mi tyari yu moni kon baka?”

’MI ABI moni fanowdu trutru!’, na so Nana, wan mama sondro masra ben prakseri. Na uma disi ben e tan nanga den dri boi fu en na ini Kaspi, wan distrikt ini a kondre Georgia. Wan mamanten a winsi di a ben abi fu feni moni, ben kon tru. A feni 300 lari (150 Amerkan dala noso 170 euro) krosibei fu a skowtu-oso. Nowan sma ben de drape. A ben de furu moni. Fu taki en leti, sensi a lari ben tron a nyun moni fu a kondre dati feifi yari pasa, dan noiti Nana ben si wan 100 lari ete. Awinsi den seriman fu a presi drape ben o wroko omeni yari langa, toku noiti den ben o meki a moni dati.

’Fu san ede mi musu teki a moni disi efu a kan meki mi lasi mi bribi, mi frede gi Gado èn mi yeyefasi?’ na so Nana prakseri. A ben kweki den fasi fu wan Kresten, srefi di a ben kisi hebi frufolgu nanga fonfon gi a bribi fu en.

Di Nana go na a skowtu-oso, a si fa feifi skowtu ben e feti e suku wan sani. Di a frustan taki na a moni den ben e suku, meki a go na den èn aksi: „Yu lasi wan sani?”

„Iya, wi lasi moni”, den taki.

„Omeni?”

„Dri hondro lari!”

„Mi feni yu moni”, Nana taki. Ne a aksi den: „Yu sabi fu san ede mi tyari yu moni kon baka?” Den skowtu no ben sabi fu san ede.

„Bika mi na wan Kotoigi fu Yehovah”, Nana ben taki moro fara. „Efu mi no ben de wan Kotoigi, dan mi no ben o tyari yu moni kon baka.”

A komandanti fu skowtu di ben lasi a moni, gi Nana 20 lari (11 euro) leki tangi fu na eerlijk fasi fa a ben tyari ensrefi.

A tori disi ben panya esi-esi ini a heri distrikt Kaspi. A tra dei, wan uma di e krin sani na a skowtu-oso taigi Nana: „[A komandanti] ala ten e hori den buku fu yu, na ini en kantoro”. Kande a sa abi moro warderi gi den now. Wan skowtu ben taki srefi:„Efu ala sma ben de Yehovah Kotoigi, dan suma ben o du ogri?”