Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• San a wani taki fu frustan fa trawan e firi, èn fu san ede Kresten musu kweki a fasi dati?

Fu frustan fa trawan e firi wani taki dati wan sma man frustan fa en ben o firi te a ben abi a srefi problema di a tra sma abi. A wani taki sosrefi dati wi man firi a pen fu a sma na ini wi eigi ati. Kresten kisi deki-ati fu ’sori taki den e firi gi trawan èn fu abi brada lobi nanga sari-ati’ (1 Petrus 3:8). Yehovah ben sori wi fa fu de wan sma di e frustan fa trawan e firi, èn wi musu teki na eksempre fu en (Psalm 103:14; Sakaria 2:8). Wi kan frustan moro bun fa trawan e firi te wi e arki bun, te wi e poti prakseri finifini na sani, èn te wi e pruberi fu frustan fa wisrefi ben o firi te wi ben sa ondrofeni wan spesrutu problema.—15/4, blz. 24-26.

• Efu wan sma wani de koloku trutru, dan fu san ede a musu kon betre na yeye fasi bifo a kon betre na skin fasi?

Furu sma di abi wan bun gosontu no e firi koloku fu di den abi tumusi furu problema. Na a tra sei, furu Kresten ini a ten disi di malengri de koloku srefisrefi fu di den e dini Yehovah. Den sma di kisi winimarki fu di den kon gosontu na yeye fasi, sa abi na okasi fu ondrofeni taki ini a nyun grontapu malengri sma no sa de moro.—1/5, bladzijde 6, 7.

• Fu san ede Hebrewsma 12:16 e agersi a sani di Esau ben du, nanga hurudu?

A Bijbel tori e sori sortu denki Esau ben abi. Esau ben poti prakseri nomo na san a ben kan kisi wantewante èn a ben wisiwasi santa sani. Efu wan sma ini a ten disi ben o bigin denki na a srefi fasi leki Esau, dan dati kan abi seryusu sondu leki bakapisi, soleki hurudu.—1/5, bladzijde 10, 11.

• Suma ben de Tertullianus èn san meki taki a kisi barinen?

Tertullianus ben de wan skrifiman èn wan sabiman fu kerkitori di ben e libi ini a di fu tu nanga a di fu dri yarihondro G.T. Sma sabi en fu di a ben skrifi wan tu buku fu horibaka gi a sokari Krestendom. Ma aladi a ben horibaka gi dati, dan a ben kon nanga idea èn leri di abi fu du nanga filosofia. Bakaten den leri nanga filosofia disi ben tron prenspari leri di no e kruderi nanga Bijbel. Wán fu den leri disi ben de a Dri-wánfasi.—15/5, bladzijde 29-31.

• Fu san ede a no de so taki den gen fu wi de frantwortu gi libisma siki, gi a fasi fa libisma e tyari densrefi, èn gi dede?

Sabidensiman taki dati a e sori leki sonwan fu den gen fu wi e meki taki wi kisi difrenti siki, èn sonwan e bribi taki den gen fu wi e meki wi tyari wisrefi na spesrutu fasi. Ma Bijbel e fruteri wi krin fa libisma du kon, èn fa den kon de nanga sondu. Aladi den gen fu wi kan abi krakti tapu a fasi fa wi de, toku a sondu fasi fu wi nanga a libimakandra abi bigi krakti na wi tapu tu.—1/6, bladzijde 9-11.

• Fa wan pisi fu wan papirus di sma feni na Oxyrhynchus na ini Egepte, e yepi wi fu frustan moro bun fa sma ben e gebroiki Gado nen?

A pisi papirus disi pe Yob 42:11, 12 fu a Griki Septuaginta skrifi na tapu, abi a Tetragrammaton (den fo Hebrew letter fu Gado nen). Disi na wan tra sani di e buweisi taki Gado nen ini Hebrewtongo ben skrifi na ini a Septuaginta, wan Bijbel fu pe den skrifiman fu den Kresten Griki Buku fu Bijbel furu tron ben teki wortu.—1/6, bladzijde 30.

• Nanga sortu disiten sport den e agersi den ogri-ati strei pe sma ben kan lasi den libi, èn di den ben hori ini a gran kownukondre Rome?

No so langa pasa, wan programa ben hori na ini a Colosseum na ini a foto Rome, na Italiakondre, di ben e sori sma sortu disiten sport gersi den fositen ogri-ati strei. Ini a programa dati, video ben de fu si fu sma di e feti nanga bulu, sma di e boks fu moni ede, sma di ben e strei rei oto noso motro èn sosrefi sma di e feti nanga makandra te den e go luku tra wega di sma e hori ini a ten disi. Den fositen Kresten ben hori na prakseri taki Yehovah no lobi ogri di e du nanga tranga, noso den sma di e du den sani dati. Kresten ini a ten disi no musu lobi den sani dati tu (Psalm 11:5).—15/6, bladzijde 29.

• Te wi e du muiti fu tron bun leriman, dan san wi kan leri fu na eksempre fu Esra?

Esra 7:10 e poti prakseri na fo sani di Esra ben du, èn wi kan meki muiti fu du den fo sani disi tu. A tekst e taki: „Esra srefi ben [1] sreka na ati fu en [2] fu go suku rai na a wet fu Yehovah èn [3] fu du en èn [4] fu leri sma ordru nanga retidu na Israel.”—1/7, bladzijde 20.

• San na den tu situwâsi pe a e fiti taki wan Kresten uma e weri wan sani fu tapu en ede?

Wan fu den situwâsi disi abi fu du nanga sani di na uma musu du ini na osofamiri. Te a e weri wan sani fu tapu en ede, dan a e sori taki a e erken en masra leki a sma di musu teki fesi ini begi èn leki a sma di musu teki fesi fu gi leri fu Bijbel. A tra situwâsi pe na uma musu weri wan sani fu tapu en ede na te a e teki prati ini afersi fu a gemeente. Na so a e sori taki a e erken a frantwortu di Bijbel gi dopu mansma, namku fu gi leri èn fu teki fesi (1 Korentesma 11:3-10).—15/7, bladzijde 26, 27.

• Fu san ede meki Kresten e taki dati yoga no de wan fasi nomo fa wan sma e oefen en skin, èn taki yoga na wan kefar?

Sma e du yoga nanga a marki fu basi den skin, so taki a sma kan kon de wán nanga wan yeye di makti moro leki libisma. Tra fasi leki fa Gado e komanderi wi, dan wan sma no abi krakti moro tapu en eigi frustan te a e du yoga (Romesma 12:1, 2). Yoga kan poti wan sma ini kefar fu afkodrei nanga towfruwroko (Deuteronomium 18:10, 11).—1/8, bladzijde 20-22.