Yu musu de wan sma di no e broko en ede nanga sani?

FURU sma ben kan firi switi te trawan e si den leki sma di no e broko den ede nanga sani, noso leki sma di no e hati den ede nanga sani. Ma son leisi a no bun te wan sma de so. Bijbel e taki: „A mi-no-ke fasi fu den sma sondro frustan, na dati sa pori den” (Odo 1:32). San a sani dati wani taki?

Na ini tra bijbelvertaling a Hebrew wortu di wani taki „mi-no-ke fasi”, vertaal leki „[a fasi di wan sma abi fu] no broko en ede nanga noti” (The New American Bible). A vertaling disi e sori taki te wan sma no e broko en ede nanga sani, dan a sma dati lesi èn a no e du sani soleki fa a fiti. Fu dati ede, wan sma di abi a fasi disi na wan don sma.

Na ini a fosi yarihondro, den Kresten na ini a gemeente fu Laodisea no ben sabi srefisrefi taki den ben swaki na yeye fasi. Fu taki en leti, den no ben e broko den ede srefisrefi nanga a sani dati. Den sma disi di ben abi mi-no-ke fasi, ben e meki bigi taki den „no [ben] abi noti fanowdu kwetikweti”. Yesus Krestes ben sori den taki dati no ben tru, èn a gi den deki-ati fu tron fayafaya Kresten baka.—Openbaring 3:14-19.

Den sma na ini a ten fu Noa ben abi mi-no-ke fasi tu. Den ben e broko den ede soso nanga den aladei sani fu a libi, den „ben e nyan èn den ben e dringi, mansma ben e trow èn umasma ben e gi fu trow . . . , èn den no ben e poti prakseri na san ben e pasa, teleki a frudu kon èn figi den alamala puru”. Ne Yesus taki moro fara: „Na so a denoya fu a Manpikin fu libisma sa de.”—Mateyus 24:37-39.

Bijbel profeititori di kisi wan kontru e sori taki wi e libi na ini a ten fu „a denoya fu a Manpikin fu libisma”, Yesus Krestes. Meki wi noiti tron sma di no e broko den ede nanga sani. Meki wi noiti tron sma di abi mi-no-ke fasi.—Lukas 21:29-36.