Wi alamala musu kisi prèise te dati de fanowdu

A BEN de wan bun dei gi a pikin meisje. A tru taki a ben musu kisi piri-ai wan tu leisi, ma tapu a spesrutu dei disi a ben tyari en srefi na wan heri bun fasi. Ma baka di en mama ben tyari en fu go sribi a neti dati, dan a mama yere a meisje e krei. Di a mama aksi a meisje fu san ede a ben e krei, dan a meisje aksi en nanga watra-ai: „Mi no ben tyari misrefi na bun fasi tide?”

We, a aksi disi hati a mama trutru. Ala leisi a ben de gaw fu gi na umapikin fu en piri-ai. Ma tide, a mama ben si fa a pikin fu en ben meki muiti fu tyari ensrefi na wan bun fasi, ma toku a no prakseri nowan leisi fu prèise a pikin.

A no pikin meisje wawan musu kisi prèise nanga deki-ati. Wi alamala musu kisi dati, neleki fa wi musu kisi rai nanga piri-ai.

Fa wi feni en te wan sma e prèise wi nanga en heri ati? A sani dati no e meki wi firi switi, èn a no e gi wi prisiri sosrefi? Kande wi sa firi taki wan sma ben poti prakseri na wi, noso taki wan sma e broko en ede nanga wi. Dati e gi wi a dyaranti taki wi no ben du muiti fu soso, èn a e gi wi deki-ati sosrefi fu tan meki muiti. A no e fruwondru wi, taki te wan sma e prèise wi nanga en heri ati, dan wi sa kon lobi a sma dati fu di a teki en ten fu taigi wi wan sani di e gi wi deki-ati.—Odo 15:23.

Yesus Krestes ben sabi fu san ede a de prenspari fu prèise trawan. Ini na agersitori fu den talenti, a masra (di ben prenki Yesus srefi) ben prèise ibriwan fu den tu getrow srafu na wan lobi-ati fasi. A ben taki: „Yu du heri bun, bun èn getrow srafu!” A sani disi e naki wi ati trutru. Aladi den srafu ben abi difrenti koni, èn aladi den no ben man du den srefi sani, toku den ala tu kisi prèise na a srefi fasi.—Mateyus 25:19-23.

Fu dati ede, meki wi memre a mama fu a pikin meisje. Wi no abi fu wakti teleki sma e krei, bifo wi e prèise den. Na presi fu dati, wi kan suku okasi fu prèise trawan. Iya, wi abi bun reide fu prèise trawan nanga wi heri ati, ibri leisi te wan okasi de fu du dati.