„Mi no ben sabi furu fu Gado”

„A DE wan yari kaba, taki Yehovah Kotoigi e kon na mi èn e prati a tumusi moi nyunsu fu a Kownukondre fu Gado nanga mi. Mi ben de Lomsu aiti yari langa, ma mi no ben sabi furu fu Gado. Na ini soso wán yari mi ben kon leri furu sani”, na so wan man ben skrifi di e libi na ini Kerala, na India. „Mi e prisiri trutru fu sabi taki A Waktitoren de na ini 139 tongo [nownow na ini 146 tongo]”, na so a man disi ben taki moro fara. „A de fu fruwondru taki sma fu ala sortu tongo e kon leri sabi a boskopu fu Gado.”

Aladi furu filosofiaman e fruklari taki wi no kan leri sabi Gado, toku na apostel Paulus ben sori krin taki wi man du dati. Paulus ben taki nanga wan grupu sma fu Ateine, èn sonwan fu den ben anbegi na wan altari di den ben gi abra na ’wan Gado di den no sabi’. Paulus ben taki: „A Gado di unu e anbegi sondro fu sabi en, na fu en mi e fruteri unu. A Gado di meki grontapu nanga ala sani na ini . . . e gi ala sma libi, bro nanga ala sani. Èn fu wán sma a meki ibri nâsi fu libisma fu libi na tapu a heri grontapu.”—Tori fu den Apostel 17:23-26.

Paulus ben gi den arkiman fu en a deki-ati fu suku fu kon sabi a Mekiman, bika „a no de fara fu ibriwan fu wi” (Tori fu den Apostel 17:27). Yehovah Kotoigi sa prisiri fu yepi yu fu kon sabi a tru Gado nanga den moi fasi fu en.