„Kon krosibei na Gado, èn a sa kon krosibei na unu”
Fosi nanga now—Fosi mi ben de wan ogriman, ma now mi abi wan tumusi moi tamara
„A WORTU fu Gado de libilibi èn a abi krakti èn a srapu moro leki iniwan feti-owru di e koti na tu sei . . . èn a man fu si krin san na ati e denki èn abi na prakseri” (Hebrewsma 4:12). Na so na apostel Paulus ben taki fu a bigi krakti di a boskopu fu Gado abi. Spesrutu na ini a fosi yarihondro G.T. a ben de krin fu si taki a boskopu fu Gado man doro na ati. Aladi den sma fu a ten dati ben abi wan takru krakti tapu trawan, toku den wan di ben tron Kresten ben musu kon kisi wan nyun fasi fu denki.—Romesma 1:28, 29; Kolosesma 3:8-10.
A krakti di a wortu fu Gado abi fu kenki sma, soleki fa dati skrifi na ini Bijbel, na a srefi krakti di e kenki sma na ini a ten disi. Fu eksempre, luku a tori fu wan langa man di tranga èn di nen Richard. Fu di Richard ben e atibron esi-esi, meki a ben e feti nanga iniwan sma di ben muilek en. A libi fu en ben lai nanga problema fu di a ben lobi feti. Richard ben go leri fa fu boks srefi, wan sport pe den e feti nanga kofu. A ben meki muiti fu leri a sport disi bun. Bakaten a ben tron a kampioen fu a grupu fu den moro bigi boksman di de na ini a foto Westfalen na ini Doisrikondre. Richard ben e dringi furu sopi sosrefi, èn disi ben abi leki bakapisi taki furu tron a ben e feti nanga trawan. Wan leisi di a ben feti, dan wan man ben dede èn pikinmoro Richard ben go na ini dungru-oso.
Fa a ben de nanga a trowlibi fu Richard? „Bifo mi nanga Heike ben studeri Bijbel”, na so Richard e memre, „dan wi no ben e poti prakseri na makandra èn wi ben e du san ibriwan fu wi ben wani. Heike ben abi furu demakandra nanga den mati fu en èn mi ben gi furu fu mi ten na den sani di mi lobi; mi ben lobi boks èn mi ben lobi seiri tapu watra. Mi ben lobi a sport tu pe sma e dyompo go na ini watra.”
Di Richard nanga Heike bigin studeri Bijbel nanga Yehovah Kotoigi, dan Richard ben firi taki a no ben man tyari den bigi kenki disi kon fu libi akruderi den hei markitiki di skrifi na ini Gado Wortu. Ma di a ben kon leri sabi Yehovah moro bun, dan a ben wani fu plisi en trutru. Richard kon si taki Yehovah no e feni en bun te sma e du ogri nanga tranga noso te sma e du ogri fu abi wan prisiriten. Richard ben leri taki ’Yehovah no lobi wan sma kwetikweti, di lobi ogri di e du nanga tranga’.—Psalm 11:5.
Boiti dati, a howpu fu libi fu têgo na ini wan paradijs na grontapu na wan sani di Richard nanga Heike ben lobi trutru. Den alatu ben wani de na ini a paradijs nanga makandra! (Yesaya 65:21-23) A kari fu „kon krosibei na Gado, èn a sa kon krosibei na unu”, ben naki na ati fu Richard trutru (Yakobus 4:8). A ben si o prenspari a de fu poti prakseri na a rai di skrifi nanga yepi fu santa yeye: „No kisi bigi-ai gi a man fu tranga ogridu, èn no teki nowan fu den pasi fu en. Bika a sma di abi triki, na wan tegu sani gi Yehovah, ma A e hori bun kompe nanga den opregti wan.”—Odo 3:31, 32.
Aladi Richard ben wani kenki en libi trutru, toku a ben kon si taki a no man du disi nanga en eigi krakti. A ben kon si taki a de fanowdu fu suku yepi na Gado na ini begi. Fu dati ede a ben du soleki fa Yesus ben taigi den apostel fu En: „Un musu tan na ai èn begi doronomo, so taki unu no sa kisi tesi. A tru taki a yeye wani, ma a skin swaki.”—Mateyus 26:41.
Baka di Richard leri fa Gado e si faya atibron, dan a ben de seiker taki boks na wan sport di a no kan du kwetikweti. Nanga a yepi di a kisi fu Yehovah èn a deki-ati di a kisi fu den wan di ben studeri Bijbel nanga en, Richard ben man tapu nanga na ogri di a ben du nanga tranga. A tapu nanga boks èn a no ben e feti moro, èn a teki a bosroiti fu abi wan moro bun osofamiri-libi. „A leri di mi kisi fu a waarheid fu Bijbel, yepi mi fu denki fosi mi du wan sani”, na so Richard e taki. Now Richard na wan safri-ati opziener na ini wan fu den gemeente fu Yehovah Kotoigi. A e taki moro fara: „Now den gronprakseri fu lobi nanga lespeki e tiri mi na ini a banti di mi abi nanga mi wefi èn nanga den pikin fu mi. Leki bakapisi fu dati, na osofamiri fu wi kon moro krosibei na makandra.”
Sma di yere sani di no yoisti fu Kotoigi, e kragi son tron taki Yehovah Kotoigi e tyari pratifasi kon na ini osofamiri. Ma na eksempre fu sma leki Richard e sori krin taki a sani disi no tru. Ma te yu e luku en bun, dan a waarheid fu Bijbel e meki sma abi koloku osofamiri èn wan tumusi moi tamara, aladi den ben de ogri sma fosi.—Yeremia 29:11.
[Prenspari pisi na tapu bladzijde 9]
„A howpu fu wan paradijs na grontapu ben yepi mi fu kenki mi libi”
[Faki na tapu bladzijde 9]
Bijbel gronprakseri di e yepi sma
Bijbel abi furu krakti tapu a libi fu sma. Dyaso wan tu Bijbel gronprakseri de di ben yepi sma di ben e du ogri nanga tranga fu kenki den libi:
„A man di no e atibron esi, moro bun leki wan tranga man, èn a man di e dwengi en yeye moro bun leki a wan di e teki wan foto abra” (Odo 16:32). Te wan sma no man hori ensrefi fu no kisi atibron dan dati na wan swakifasi, a no e sori taki a sma tranga.
„Na inzicht fu wan sma seiker e meki taki a no e kisi atibron esi-esi” (Odo 19:11). Te wan sma abi a koni fu man si sani krin èn te a e frustan fa wan situwâsi de, dan dati sa yepi en fu si san na den trutru problema èn a sa man hori ensrefi fu no atibron esi.
’No abi demakandra nanga iniwan sma di e atibron esi so taki yu no sa sabi den pasi fu en’ (Odo 22:24, 25). Na wan koni fasi, Kresten no e suku demakandra nanga sma di e atibron esi.