Trutru yepi gi den pôtisma
DI Yesus Krestes, a Manpikin fu Gado, ben de na grontapu, dan a ben sori taki a wani yepi den pôtisma trutru. Wan sma di ben si nanga en eigi ai san Yesus ben du na ini a diniwroko fu en, ben taki: „Den brenisma e si baka, den malengrisma e waka, den gwasiman kon krin, den dofusma e yere, den dedesma kisi wan opobaka, èn den pôtisma e yere a bun nyunsu” (Mateyus 11:5). Ma fa a de nanga den milyunmilyun pôtisma na ini a ten disi? Iniwan bun nyunsu de gi den sma disi? Iya, wan boskopu de di e gi howpu!
Furu tron sma na ini a grontapu disi no e poti prakseri na den pôtisma. Ma a Wortu fu Gado, Bijbel, e pramisi: „A no fu ala ten den sa frigiti den pôtisma, èn a howpu di den safri-ati sma abi no sa lasi gowe fu têgo” (Psalm 9:18). Den wortu disi di e gi trowstu sa kon tru te a Kownukondre fu Gado, wan trutru tirimakti na ini hemel, sa kon na ini a presi fu ala den libisma tirimakti (Danièl 2:44). Yesus di de leki Kownu fu a tirimakti na ini hemel, „sa firi sari gi a mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den, èn a brudu fu den sa de warti na ini en ai.”—Psalm 72:13, 14.
Fa a libi sa de te Krestes e tiri grontapu? Den wan di e libi na ondro a tiri fu Krestes sa kisi prisiri fu a wroko di den e du. Bijbel e taki na ini Mika 4:3, 4: „Den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi; bika na a mofo fu Yehovah fu den legre srefi di taki disi.” A Kownukondre fu Gado sa puru siki nanga dede srefi (Yesaya 25:8). Grontapu sa de heri tra fasi! Wi kan bribi den pramisi disi fu Bijbel bika na Gado srefi ben meki sma skrifi den.
Boiti taki Bijbel e gi wi wan boskopu di e gi howpu, dan a e yepi wi tu fu sabi fa wi kan handri te wi abi problema na ini wi ala dei libi. A e sori fa fu wini a firi di wan sma e firi taki a no warti noti, kande fu di a pôti. Wan pôti Kresten di studeri Bijbel, sabi taki Gado e si en leki wan warti sma, neleki fa A e si den Kresten di gudu. A Bijbel buku Yob e taki dati Gado „no poti moro prakseri na tapu a heihei man leki na tapu a mofinawan. Bika den alamala na wroko fu en anu” (Yob 34:19). Gado lobi den pôtisma na a srefi fasi leki fa a lobi den gudusma.—Tori fu den Apostel 10:34, 35.