„Mi feni mati, lobi, èn sma di e broko den ede nanga mi”
„NA A fasi disi ala sma o sabi taki unu na mi disipel, te unu lobi makandra” (Yohanes 13:35). Neleki fa Yesus ben taki, dan grontapu ben kon sabi den fosi Kresten leki sma di abi trutru lobi. Moro leki wan hondro yari baka a dede fu Krestes, Tertulianus ben skrifi den sani di sma ben taki fu den bakaman fu Krestes. A ben skrifi: ’Luku fa den lobi makandra èn fa den de klariklari srefi fu dede gi makandra.’
A sortu lobi dati de fu feni na grontapu ete? Iya. Luku fu eksempre wan brifi di a bijkantoro fu Yehovah Kotoigi na ini Brasyonkondre ben kisi. Marília, na uma di skrifi a brifi, ben skrifi:
„Di wi ben e libi na ini a foto Villa Mercedes na ini Argentina, dan mi mama, di de wan Yehovah Kotoigi, kon kisi a siki di nen osteoartritis. A siki disi meki taki a lan fu en dyonku go na en futu so taki a no ben man waka moro. Na ini den fosi aiti mun fu en siki, a ben de den Kotoigi di e libi na ini Villa Mercedes di ben e sorgu en na wan lobi-ati fasi. Den ben sorgu gi ala sani; den ben e krin na oso fu en èn den ben e bori nyanyan gi en. Srefi di a ben de na ati-oso, dan ala ten mi mama ben abi wan sma na en sei, dei nanga neti.
Baka dati, mi nanga mi mama drai go baka na Brasyonkondre pe a e kisi yepi ete fu kon betre baka. Den kotoigi pe wi e tan now e du ala san den man fu yepi mi mama fu kon betre baka.”
Marília ben skrifi na a kaba fu en brifi: „Mi musu fruteri taki mi a no wan Kotoigi, ma na mindri den Kotoigi mi feni mati, lobi, èn sma di e broko den ede nanga mi.”
Fu tru, sma de ete di e sori a trutru Kresten lobi. Na a fasi dati, den e sori taki den leri fu Yesus kan abi krakti tapu a libi fu wi.