Yu e angri fu libi na ini wan grontapu sondro frede?

„Wi e libi na ini ’wan ten pe furu sma e frede èn . . . den no sabi san fu du’, fu di den e denki taki ’wan ogri . . . kan miti den iniwan momenti èn na iniwan fasi, sondro taki den fruwakti dati.’”

DEN wortu disi, di ben skrifi na ini a tijdschrift Newsweek a yari di pasa, e sori fa furu sma e firi na ini a bruya grontapu fu a ten disi. Yesus Krestes ben sori taki sma ben o kisi den sortu firi disi moro nanga moro na ini a ten di ben o kon. A ben taki na fesi dati wan ten ben o kon pe den nâsi ben o pina so te, taki den no ben o sabi san fu du; sma ben o lasi-ati krinkrin fu di den frede èn fu di den no sabi san o pasa nanga a grontapu. Ma wi no abi fu frede, noso firi leki nowan howpu no de, bika Yesus ben taki moro fara: „Te den sani disi e bigin pasa, opo tanapu leti-opo èn opo un ede go na loktu, bika a frulusu fu unu e kon krosibei.”—Lukas 21:25-28.

Yehovah Gado ben taki na ini sortu situwâsi a pipel fu en ben o libi na grontapu, baka di a frulusu den. A ben taki: „Mi pipel musu tan na ini wan presi pe vrede de èn na tanpresi di sma e frutrow dorodoro èn na rostupresi pe sma no abi nowan broko-ede” (Yesaya 32:18). Nanga yepi fu en profeiti Mika, Yehovah ben taki: „Den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi.”—Mika 4:4.

Dati na wan bigi difrenti nanga a libi fu a ten disi! Sma no abi fu frede taki wan ogri sa miti den. Na presi taki den e bruya èn taki den no sabi san fu du, den sa libi na ini vrede èn den sa de koloku fu têgo.