Nyanyan yuru—A no soso wan ten fu nyan!

ALA sma e prisiri te den e nyan wan switi nyanyan. Den okasi disi e gi wi moro prisiri te wi abi bun takimakandra nanga sma di wi lobi èn te wi abi switi demakandra nanga den, so taki wi no e nyan nomo fu tapu wi angri. Furu osofamiri abi a gwenti fu nyan nanga makandra, awinsi wán leisi wan dei. Te memre fu wan osofamiri e nyan nanga makandra, dan den abi na okasi fu taki fu sani di den du a dei dati noso fu sani di den o du a dei dati. Den pikin kan fruteri wan tori èn den kan taki fa den e firi, èn te papa nanga mama e arki den, den kan kon sabi fa den yongu pikin fu den e denki èn fa den e firi. Baka wan pisi ten, den prisiri èn switi momenti te wan osofamiri e nyan nanga makandra e meki taki den e firi moro bun, den e frutrow makandra moro èn a lobi di den abi gi makandra e gro. Dati sa meki taki na osofamiri e kisi wan tranga banti.

Na ini a ten disi, wan lo memre fu osofamiri abi furu fu du ala ten, èn dati meki den e feni taki den no abi ten fu nyan nanga makandra. Na son presi fu grontapu, yu abi libimakandra pe sma no mag nyan nanga makandra leki osofamiri, noso den no mag taki srefi te den e nyan. Tra osofamiri abi a gwenti fu leti a telefisi te den e nyan, èn disi e meki taki den no abi okasi moro fu taki fu bun sani.

Ma ala ten, Kresten papa nanga mama e suku okasi pe den kan gi na osofamiri fu den deki-ati (Odo 24:27). Langa ten pasa, papa nanga mama ben kisi fu yere taki a moro bun okasi fu taki fu Gado wortu nanga den pikin fu den, ben de ’te den e sidon na ini den oso’ (Deuteronomium 6:7). Te papa nanga mama abi a gwenti fu sidon nyan nanga den pikin fu den, dan den abi wan moi okasi fu yepi den pikin fu kisi moro lobi gi Yehovah èn gi den regtfardiki gronprakseri fu en. Te yu e sorgu taki ala sma e prisiri èn e firi switi te yu e nyan makandra nanga yu osofamiri, dan den sosrefi sa prisiri fu den okasi dati èn den sa kisi deki-ati tu. Iya, meki nyan yuru de moro leki wan ten fu nyan nomo!