Aksi fu leisiman

A de so, taki David di de wan man di ben e plisi Gado ati, ben handri na wan ogri-ati fasi nanga den strafuman fu en, soleki fa son sma e denki te den e leisi 2 Samuel 12:31 nanga 1 Kroniki 20:3?

Nôno. A wan-enkri sani di David ben du na taki a ben strafu den Amonsma meki den du tranga wroko. Sma no ben frustan bun san David ben du, te den e leisi a fasi fa wan tu bijbelvertaling ben taki fu den tekst disi.

Te den bijbelvertaling disi e taki fu a strafu di David ben gi den Amonsma, dan a gersi leki David ben de wan ogri-ati man. Fu eksempre, 2 Samuel 12:31 e taki na ini a King James Version: „A teki den sma di ben de drape èn a poti den na ondro sa, na ondro isri wrokosani di sma ben gebroiki fu drai a doti, na ondro isri aksi, èn a meki den go na ini den onfu di sma e gebroiki fu meki ston: na so a ben du nanga ala den pikin fu Amon na ini den foto.” A tori na ini 1 Kroniki 20:3 vertaal na a srefi sortu fasi.

Ma soleki fa a sabiman fu Bijbel, Samuel Rolles Driver taki, dan ogri-atifasi „na wan eigifasi di David no abi srefisrefi”. Fu dati ede, The Anchor Bible e taki: „David ben gebroiki den strafuman leki wrokoman so taki a ben kan meki moni na ini a kontren di a wini; soleki fa a sori, dan disi ben de wan gwenti fu den kownu di ben wini wan feti.” Na so Adam Clarke e si a tori tu, te a e taki: „Fu dati ede wi musu frustan taki David ben meki a pipel tron srafu, èn a ben gebroiki den fu sa sani, fu meki isri wrokosani fu drai a doti, noso fu diki olo, . . . fu kerfu udu, èn fu meki ston. Na ini a tekst disi den no e taki kwetikweti fu a sa di den e sa libisma na pisipisi, noso e kapu den na pisipisi, noso taki den ben o kerfu den, èn a no de so tu ini a tori di e taki fu a fasi fa David ben handri nanga den Amonsma.”

Difrenti bijbelvertaling fu a ten disi e frustan a tori na a yoisti fasi, èn den e tyari kon na krin taki sma no kan taki fu David taki a ben handri na wan ogri-ati fasi nanga libisma.a Luku fa a New English Translation (2003) e taki en: „A ben puru den sma di ben de na ini èn a meki den du tranga wroko nanga sa, isri tiki, nanga isri aksi, èn a ben meki den wroko na den onfu fu meki ston. Na so a ben du nanga ala den foto fu den Amonsma” (2 Samuel 12:31). „A teki den sma di ben tan na ini a foto èn a meki den wroko nanga sa, isri tiki, nanga aksi. Na disi David ben du nanga ala den foto fu den Amonsma” (1 Kroniki 20:3). A fasi fa a Nieuwe-Wereldvertaling vertaal a tori disi, de sosrefi akruderi a fasi fa den Bijbel sabiman e si a tori na ini a ten disi: „A puru den sma di ben de na ini a foto, èn a meki den e sa ston, a meki den wroko nanga srapu isri wrokosani, èn nanga isri aksi, èn a ben meki den e meki ston” (2 Samuel 12:31). „A puru den sma di ben de na ini a foto, èn a meki den e sa ston, e wroko nanga srapu isri wrokosani, èn nanga aksi; èn disi na a fasi fa David ben handri nanga ala den foto fu den manpikin fu Amon.”​—1 Kroniki 20:3.

David no ben handri na wan ogri-ati fasi nanga den Amonsma èn a no ben kiri den na wan ogri-ati fasi. A no ben du den srefi ogri-ati sani di sma ben gwenti du na ini orloku na ini a ten dati.

[Futuwortu]