„Den no drai baka gi a bribi fu den”

„KOLOKU fu unu te sma e gi unu porinen èn te den e frufolgu unu, aladi den e lei èn e taki ala sortu ogri fu unu, fu mi ede”, na so Yesus Krestes ben taigi den disipel fu en (Mateyus 5:11). Yehovah Kotoigi na ini a ten disi de koloku fu di den e gi yesi na den leri fu Krestes, èn den e teki na eksempre fu en fu di den „no de wan pisi fu grontapu”, den no e bumui nanga politiek afersi, èn den e tan getrow na Gado awinsi san e pasa.​—Yohanes 17:14; Mateyus 4:8-10.

Yehovah Kotoigi di ben e libi na ini a kontren di sma ben e kari a Sovyet-Unie fosi, sobun den wan di ben e libi na ini Estkondre sosrefi, no drai baka noiti gi a bribi fu den. Toomas Paul, di de wan sabiman fu kerkitori èn wan sma di vertaal Bijbel, skrifi fu a sani disi na ini en buku Kirik keset küla (A kerki di ben de na mindrisei fu a dorpu): „Wan tu sma nomo yere san ben pasa frukufruku mamanten tapu 1 april 1951. Sma ben seti wan plan fu puru ala Yehovah Kotoigi na ini a kondre èn sosrefi ala den sma di ben e bumui nanga den. Ala nanga ala, den ben kisi 279 sma èn den ben seni den sma disi go na Siberia . . . Den ben gi den sma disi na okasi fu poti den nen na tapu wan papira pe ben skrifi taki den no de na bribi moro; na so fasi den no ben abi fu go na Siberia, noso na strafu-oso. . . . A grupu sma di den ben poti na strafu-oso fu a sani disi ede, ben de 353 sma te yu e teri den makandra nanga den wan di den ben kisi kaba. Na den mindri yu ben abi sowan 171 sma di ben e go nomo na den konmakandra fu den Kotoigi. Den no drai baka gi a bribi fu den, srefi na ini Siberia den no du dati. . . . A no furu sma fu a [Luther] Kerki [fu Estkondre] ben abi so wan bribi leki di fu den Yehovah Kotoigi.”

Yehovah Kotoigi na heri grontapu abi a frutrow taki Gado o yepi den fu tan getrow èn fu tan gi yesi na en, awinsi trawan e frufolgu den. Den breiti fu sabi taki den sa kisi wan bigi pai te den tan getrow.​—Mateyus 5:12.