Yu man taki bun nanga yu trowpatna?
WAN tu yari pasa, wan bangi na ini Yapan ben hori wan strei di ben abi a nen: „Wan lobi-brifi di wan sma fu 60 yari skrifi.” Na ini a strei disi, sma fu sowan 50 noso 60 yari ben kisi a deki-ati fu fruteri na ini wan brifi san den e „firi trutru” gi a trowpatna fu den. Disi na san wan man ben skrifi gi en wefi: „Kande yu o lafu, ma a o hati mi efu mi no taki fa mi e firi: Nanga mi heri ati mi wani taigi yu tangi taki yu trow nanga mi.”
Na ini difrenti kulturu, sosrefi na ini wan tu kulturu na owstusei fu Asia, sma no abi a gwenti fu taki fa den e firi. Ma toku, moro leki 15.000 sma ben teki prati na a strei fu skrifi lobi-brifi gi a trowpatna fu den. Fu di so furu sma ben teki prati na a strei disi, meki den hori en ete wan leisi, èn den ben skrifi buku srefi di e taki fu den lobi-brifi disi. A sani disi e sori taki furu sma e angri trutru fu fruteri san den e firi gi a lobi trowpatna fu den. Ma trawan no wani du dati. Fu san ede? Kande na fu di den musu du muiti èn den musu abi a koni fu meki trawan, soleki a trowpatna fu den, frustan fa den e firi.
Hitoshi Kato ben skrifi wan buku di e taki fu sma di go nanga pensyun, èn na ini a buku a taki dati te owrusma na ini Yapan e broko trow, dan nofo tron a wefi e du dati fu di a kweki wan bita-ati gi en masra na ini ala den yari di den ben de makandra. A e taki sosrefi: „A sani disi e pasa tu fu di den trowpatna no e taki nanga makandra te den abi problema.”
Fu dati ede, a kan de so taki syatu baka te wan masra e go nanga pensyun, en wefi wani broko trow, aladi a masra no e fruwakti dati srefisrefi. A kan taki furu yari langa den trowpatna no taki san den e firi gi makandra. Kande a masra nanga a wefi ben pruberi fu taki fa den e firi, ma den no ben man du dati na wan switi fasi. Na presi taki den kisi wan moro bun banti nanga makandra, den ben e meki trobi nanga makandra doronomo.
Efu problema de, dan fa masra nanga wefi kan lusu den problema sondro fu meki trobi, èn fa den kan fruteri makandra na wan switi fasi san den e firi? Kande yu o feni en wan moi sani fu sabi taki den moro bun rai di abi fu du nanga a trowlibi, no de fu feni na ini wan buku fu disiten di e gi trowpatna rai fu kisi wan bun trowlibi. A moro bun rai gi trowpatna de fu feni na ini wan buku fu owruten di furu sma e si leki wan warti sani hondrohondro yari kaba. A buku dati na a Bijbel.