„Wan moro swaki prapi” warti trutru
NA APOSTEL Petrus ben skrifi: „Un masra, na so un musu tan libi tu nanga un wefi na wan fasi di e sori taki unu abi sabi, aladi unu e gi na uma grani fu di a de wan moro swaki prapi” (1 Petrus 3:7). Soleki fa a tekst disi e sori, dan Bijbel e agersi wan umasma nanga „wan moro swaki prapi”. Disi wani taki dan dati umasma no warti srefisrefi? Meki wi go luku san na apostel Petrus ben abi na prakseri di a taki den wortu disi.
A Griki wortu di vertaal nanga „gi grani”, wani taki „si leki wan warti sani, . . . sori lespeki gi”. Sobun, wan Kresten masra musu handri nanga en wefi na wan lobi-ati fasi, èn a musu hori den firi fu en na prakseri, fu di en wefi de neleki wan moi prapi di warti trutru. Disi no e sori srefisrefi taki wan masra musu wisiwasi en wefi. Luku na eksempre fu wan spesrutu sortu lampu di sma e kari Tiffany lotus lampu. A lampu disi meki leki wan sortu bromki èn a grasi fu en abi difrenti kloru. Den lampu disi moi kefalek, èn den warti trutru. A lampu disi kan broko makriki. Ma disi wani taki dati a no warti noti? Kwetikweti! Na ini a yari 1997, wan fu den Tiffany lampu disi, ben seri gi 2,8 milyun Amerkan dala! Na fu di a meki na so wan fasi taki yu musu pepe-pepe en, meki a diri so.
Na so a de tu taki, te Bijbel e agersi wan umasma nanga wan moro swaki prapi di musu kisi grani, dan dati no wani taki dati a no warti srefisrefi. Te wan masra e libi nanga en wefi na wan fasi di e sori taki ’a abi sabi’, dan a sa hori na prakseri san en wefi man du èn san a no man du, san a lobi èn san a no lobi, fa a e prakseri fu sani èn fa a e firi. Wan masra di lobi en wefi, sabi taki en nanga en wefi no de a srefi èn a e lespeki dati. A e hori den firi fu en na prakseri, „so taki nowan sani e tapu den begi fu [en]” (1 Petrus 3:7). Wan masra di no e sori warderi gi den moi fasi di en wefi abi, kan lasi en matifasi nanga Gado. A de krin taki Gado Wortu no e taki dati umasma no warti noti. Na presi fu dati, a e gi grani na umasma.
[Sma di abi a reti fu a prenki na tapu bladzijde 32]
© Christie’s Images Limited 1997