„A moro moi foto na ini heri Galilea”
PIKINMORO siksi nanga afu kilometer na a noord-westsei fu Nasaret, a foto pe Yesus gro kon bigi, yu ben abi wan foto di den Evangelie tori noiti no taki fu en. Ma toku Flavius Josephus, a fosi yarihondro Dyu historia skrifiman di furu sma ben sabi, kari a foto disi „a moro moi foto na ini heri Galilea”. Disi ben de a foto Sepphoris. San wi sabi fu a foto disi?
Baka di Herodes a Bigiwan dede, kande na ini a yari 1 b.G.T., den sma fu a foto Sepphoris opo densrefi teige a tirimakti fu Rome, èn leki bakapisi fu dati a foto Sepphoris kisi pori. Antipas, a manpikin fu Herodes, kisi Galilea nanga Perea leki gudu, èn a bosroiti fu bow Sepphoris baka èn fu meki a tron a nyun mamafoto. Den bow a foto baka na a fasi fa den Grikisma nanga den Romesma ben gwenti fu bow, aladi moro furu Dyu ben e tan na ini a foto drape. Soleki fa Professor Richard A. Batey taki, dan a foto disi ben tron „a presi fu pe a tirimakti fu Rome ben e tiri Galilea nanga Perea”. Dati tan so teleki Antipas bow a foto Tiberias na a ten fu 21 G.T., èn a foto disi ben musu tron a nyun mamafoto na presi fu Sepphoris. Na a ten disi, Yesus ben e libi krosibei fu a foto dati.
Professor James Strange, di ondrosuku owruten sani na ini Sepphoris, e denki taki a foto disi ben abi kantoro di ben abi ala sortu dokumenti na ini, sosrefi presi pe lanti ben e kibri den gudu fu en, den ben abi fetisani, bangi pe sma ben e poti den moni, nanga lanti kantoro. Na ini a foto dati, wowoyo ben de tu pe sma ben e seri sani di meki fu kleidoti, yu ben abi grasi sani, isri sani, gowtu sani, èn difrenti sortu nyanyan. Yu ben abi sosrefi sma di ben e meki krosi èn ben e seri krosi, wenkri pe sma ben kan bai baskita, sturu, tafra, switismeri, nanga den sortu sani dati. Sabiman e denki taki na a ten dati sowan 8000 te go miti 12.000 sma ben e libi na ini a foto.
Oiti Yesus ben go na a prenspari foto disi? Sma na ini Nasaret ben abi fu waka wán yuru fu doro na a foto dati. Den Evangelietori no e taki efu Yesus ben go drape. Ma wan wortubuku e taki dati „te sma ben e go fu Nasaret na Kana di ben de na ini Galilea, dan furu fu den ben e teki wan pasi di ben e koti pasa na ini Sepphoris” (The Anchor Bible Dictionary) (Yohanes 2:1; 4:46). Te sma ben de na ini Nasaret, dan den ben kan si a bergi di Sepphoris ben de na tapu. A bergi dati ben hei sowan 120 meter. Son sma e bribi taki di Yesus ben gi na agersitori fu ’wan foto di no man kibri te a de na tapu wan bergi’, dan kande a ben abi a foto disi na prakseri.—Mateyus 5:14.
Baka di Yerusalem kisi pori na ini 70 G.T., dan Sepphoris tron a moro prenspari Dyu foto na ini Galilea, èn bakaten a Sanhedrin, noso a gran krutu fu den Dyu ben e hori drape. Wan pisi ten a foto disi ben e go na fesi, fu di a ben de wan prenspari presi pe Dyu sabiman ben e go fu teki leri èn fu gi sma leri.
[Karta/Prenki na tapu bladzijde 32]
(Efu yu wani si pe den sani disi skrifi, luku a tijdschrift)
Se fu Galilea
GALILEA
Kana
Tiberias
SEPPHORIS
Nasaret
PEREA
[Sma di abi a reti fu den prenki na tapu bladzijde 32]
Pottery: Excavated by Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd