A fasi fa den ben kon sabi pe èilanti ben de na ini wan bigi se
DEN Marshall-èilanti na wan grupu fu moro leki 1200 bigi èilanti nanga pikin èilanti. Furu fu den no hei moro leki siksi meter. Te yu ben o komoto na so wan èilanti go na se, dan fosi yu denki, yu no ben o man si en moro te yu ben o luku go na baka. Toku den fositen sma fu den Marshall-èilanti ben man komoto fu a wan pikin èilanti go na wan tra pikin èilanti na ini den kruyara fu den. Aladi a pisi kontren na ini a Grote Oceaan, noso a bigi se disi, bigi sowan 650.000 fokanti kilometer, toku den ben man feni den presi pe den ben wani go. Fa den ben man du dati? Den ben e meki wan sortu karta fu tiki, di ben e yepi den bun fu sabi pe den musu go.
Ondrofeni ben leri den botoman fu den Marshall-èilanti taki den èilanti na ini a se e meki taki difrenti sortu skwala e kon na tapu a watra. Den ben kan si na den skwala pe wan èilanti de, awinsi na èilanti dati ben de 30 kilometer moro fara. Den botoman ben musu kon sabi den someni sortu skwala di a watra e meki. A karta fu tiki ben e yepi den fu memre ala den skwala dati. Fa den ben e meki a karta disi? Soleki fa yu kan si na tapu a prenki, dan den ben e meki den tiki fu a rutu fu pandanus-bon, noso den ben e puru a tranga mindripisi fu den wiwiri fu krontobon. Baka dati, den ben e fasi den tiki na makandra, èn disi ben musu agersi den skwala. Dan den ben e fasi pikin skropu na en tapu, so taki den ben kan sabi pikinso o fara a wan èilanti ben de fu a trawan.
Furu yari langa, sma no ben sabi taki den botoman ben e gebroiki so wan sani fu go na difrenti presi. Soso spesrutu sma ben kisi na okasi fu leri wroko nanga a sortu karta disi. Fa wan yongu botoman ben e leri fu wroko nanga a karta? We, te a ben e go na se, dan a ben musu gebroiki en ibri tron baka. Wan botoman di abi ondrofeni ben e leri a yongu botoman fa fu wroko nanga a karta, kande fu di a ben e tyari en go na èilanti di ben de krosibei. O moro a yongu botoman ben kon sabi den difrenti sortu skwala, o moro a ben e si fa a karta disi ben yepi en te a ben de na se. Te fu kaba, a ben kan go en wawan na tapu a bigi se.
Na so a de tu nanga Gado Wortu, Bijbel. A kan sori wi fa wi musu tyari wisrefi na ini a libi. Na ini a bigin, a kan taki wan sma e yepi wi fu leri den moro prenspari sani fu Bijbel. Bakaten te wi e studeri Gado Wortu moro fara èn te wi e gebroiki den rai na ini wi libi, dan wi o si moro nanga moro o bun den sani de di skrifi na ini Gado Wortu. Yosua, a fesiman fu den Israelsma, ben kisi a rai fu tan leisi Gado Wortu, so taki a ben o man „handri soifri akruderi ala sani di skrifi na ini”. „Na so fasi”, Gado taigi Yosua, „sani sa waka bun nanga yu èn na so fasi yu sa handri nanga koni” (Yosua 1:8). Iya, a Bijbel kan sori wi finifini fa wi musu tyari wisrefi na wan yoisti fasi, so taki wi libi kan waka bun.
[Prenki na tapu bladzijde 32]
© Greg Vaughn