„Fu san ede wi de na libi?”

ELIE WIESEL, wan man di ben wini a Nobelprijs èn di pasa a Nazi Holocaust libilibi, ben taki fu wan aksi di a kari „a moro prenspari aksi di libisma musu poti prakseri na en”. Na aksi disi na: „Fu san ede wi de na libi?”

Oiti yu poti prakseri na a aksi disi? Furu sma aksi densrefi a sani disi, ma den no feni piki. Arnold Toynbee, wan historia sabiman fu Ingrisikondre, pruberi fu fruklari san na a marki fu a libi, èn a skrifi: „A wan-enkri tru marki fu libisma, na fu gi Gado glori èn fu kon de koloku fu di den e dini En fu têgo.”

A moi fu si taki moro leki dri dusun yari pasa, wan tra man, di sma ben sabi leki wan man di ben e poti prakseri na a libi, ben kon sabi kaba san na a piki tapu a prenspari aksi disi. A koni Kownu Salomo ben taki: „Now di sma yere ala sani, dan a bosroiti fu a tori na disi: Abi frede gi a tru Gado èn hori yusrefi na den komando fu en. Bika disi na a plekti fu libisma.”—Preikiman 12:13.

Yesus Krestes, a Manpikin fu Gado, ben sori taki a prenspari gronprakseri disi tru. Di Yesus ben de na grontapu, dan a du ala san a man fu gi glori na en hemel Tata. Yesus ben abi wan marki na ini en libi, fu di a ben e dini en Mekiman. A sani disi ben e gi en deki-ati, èn fu dati ede a ben man taki: „Mi nyanyan na taki mi musu du a wani fu a sma di seni mi kon.”—Yohanes 4:34.

Sobun, fu san ede wi de na libi? Neleki Yesus, Salomo, nanga furu tra futuboi fu Gado, wi kan kon abi wan tru marki na ini a libi, èn wi kan de koloku fu têgo te wi e du a wani fu Gado. Yu wani sabi fa fu dini Gado „nanga yeye èn nanga waarheid”? (Yohanes 4:24) Yehovah Kotoigi na ini a kontren fu yu sa breiti fu yepi yu fu piki na aksi disi.