Prenspari sani di yonguwan musu leri

GLADYS e wroko na wan skoro na ini a foto Mendoza, na Argentinia. Wan dei a ben waka pasa wan klas èn a si fa wan skoromisi fu a di fu fo klas ben e leisi wan pisi fu a buku Mi boekoe nanga bijbel tori gi den pikin fu a klas.a Gladys taigi a skoromisi taki en na wan Kotoigi fu Yehovah èn a ben wani sori en san a kan du fu leri moro fu a buku. A skoromisi ben lobi den sani di Gladys sori en, èn a ben wani gebroiki a buku disi fu gi les na a klas fu en. Ma a skoromisi ben musu aksi primisi fosi fu a skoro. A no de fu taki dati a ben breiti di a kisi primisi fu gebroiki a buku.

Bakaten, a skoro ben hori wan spesrutu dei gi den pikin, so taki den kan leisi moro. Tapu a dei dati a skoromisi taigi den pikin fu en klas, fu leisi wán les fu a buku gi den tra pikin fu a skoro. Fu di sani waka so bun tapu a dei dati, meki a skoromisi kisi wan kari fu kon na wan telefisi programa. A man fu a telefisi programa ben wani sabi fa den pikin e tyari densrefi na ini a klas, èn a ben aksi a skoromisi: „San yu e du fu meki den pikin na ini a klas fu yu tyari densrefi bun?” A skoromisi ben taki dati a ben e gebroiki wan buku di nen Mi boekoe nanga bijbel tori. A ben fruteri a man taki, a no e gebroiki a buku fu leri den pikin na ini en klas kerkitori, ma a e gebroiki a buku fu leri den pikin fa den kan tyari densrefi na wan fasi di fiti. A ben kan leri den pikin fu eksempre fa den musu sori lespeki, fa den musu abi pasensi, fa den kan sorgu taki pratifasi no de, fa den kan wroko nanga makandra, fa den musu gi yesi, èn fa den kan sori taki den lobi trawan. Ala sma ben agri taki den sani disi na prenspari sani di yonguwan musu leri.

Yu wani leri den pikin fu yu den sortu moi fasi disi? Yu kan aksi wan Kotoigi fu Yehovah wán fu a tumusi moi buku disi di nen Mi boekoe nanga bijbel tori.

[Futuwortu]