A bribi fu wan mama ben de wan bigi trowstu
„Efu unu e leisi a brifi disi, dan na oparâsi no waka bun, èn mi no de moro nanga unu.”
DISI na den fosi wortu fu wan brifi di Carmen, wan Kresten mama, skrifi gi den dri umapikin fu en di abi 25 yari, 19 yari, nanga 16 yari. A kon pasa taki na oparâsi no ben waka bun, èn a de wan sari sani taki Carmen kon lasi en libi.
Na wan tumusi sari sani taki den dri umapikin disi no abi mama moro, iya, a e broko yu ati te yu e luku a tori disi. Ma toku, a tranga bribi di a mama disi ben abi na ini Yehovah èn na ini den pramisi fu en, trowstu en trutru. Fu dati ede, a mama disi ben abi wan korostu firi, èn dati de fu si na ini a heri moi brifi di a skrifi. Luku san a taigi den umapikin fu en.
„Mi wani taigi unu taki mi lobi unu nanga mi heri ati. . . . Unu na trutru bun umapikin di wan mama kan abi, èn mi lobi fa unu de.
Mi ben sa wani tan na libi so taki mi ben kan go nanga unu na ini a nyun grontapu di Gado pramisi. . . . Ma fu di dati no de so, meki mi aksi Gado fu yepi unu so taki unu kan tan getrow. Wi horidoro di wi ben kisi furu tesi, èn noiti Yehovah libi wi. . . . Fu dati ede, tan abi a frutrow taki den rai di a e gi nanga yepi fu en organisâsi na bun rai, èn tan horibaka gi a gemeente nanga den owruman. Preiki so furu leki unu kan èn abi lobi gi ala den brada nanga sisa.
Heri esi wi o de nanga makandra baka. . . . Mi e begi unu pardon gi ala den fowtu di mi meki èn gi ala den leisi di mi no ben frustan unu, noso di mi no taigi unu o furu mi lobi unu. . . . Mi sabi taki ibriwan fu unu e difrenti, èn fu dati ede unu abi difrenti sani fanowdu. Yehovah sabi moro leki unu san unu abi fanowdu, èn a sa sorgu taki unu kisi ala den sani dati. Boiti dati a sa blesi unu fu a fasi fa unu horidoro.
Noiti no frigiti a marki di unu abi, namku fu go na ini a nyun grontapu. Tan meki tranga muiti fu doro drape. Meki a de so taki Yehovah blesi unu èn meki a gi unu krakti so taki unu tan getrow te na a kaba. . . . No sari, mi lobi umapikin. Mi lobi unu!”
Wan sari sani kan miti iniwan fu wi. „Ten nanga sani di e pasa sondro fu sma fruwakti dati, e miti den alamala”, na so Kownu Salomo fu owruten ben skrifi (Preikiman 9:11). Ma den wan di abi wan tranga bribi na ini Gado, kan abi a srefi howpu di na apostel Paulus abi, di a taki: „Mi de seiker taki noti no sa man puru wi fu a lobi fu Gado; dede no sa man du dati, èn libi no sa man du dati; . . . èn nowan enkri tra sani di Gado meki, sa man puru wi fu a lobi fu Gado, iya, a lobi di de na ini Krestes Yesus, wi Masra.”—Romesma 8:38, 39; Hebrewsma 6:10.