A gwenti di sma fu Israel ben abi fu skrifi sani

OITI yu leisi den tu prenspari owruten puwema fu Grikikondre, namku na Iliad èn na Odyssey? Sma e bribi taki den puwema disi ben skrifi na a ten fu a di fu neigi, noso a di fu aiti yarihondro bifo Krestes. Fa den puwema disi e difrenti fu Bijbel, di sma ben bigin skrifi furu hondro yari na fesi? Wan buku e taki: „Bijbel e sori sowan 429 leisi taki sma ben man skrifi èn taki den ben e skrifi sani poti na tapu papira. A sani disi na wan aparti sani fu di na Iliad e taki wán leisi nomo taki sma ben man skrifi na a ten dati, èn na Odyssey no e taki noti fu dati” (The Jewish Bible and the Christian Bible).

Wan tra buku e tyari kon na krin taki „na ini na anbegi fu den owruten Israelsma a ben de prenspari taki sma ben musu man leisi èn skrifi” (The Oxford Encyclopedia of Archaeology in the Near East). Fu eksempre, sma ben skrifi a Wet frubontu, èn bakaten den ben e leisi en gi ala mansma, umasma, nanga pikin. Sma ben e leisi a Wet tu na ini grupu, noso gi densrefi. Baka di Alan Millard, wan prenspari leriman na a Universiteit fu Liverpool, poti prakseri na wan tu sani fu a Wet, dan a taki: „Pikinmoro ala sma na ini Israel ben man leisi èn skrifi.”—Deuteronomium 31:9-13; Yosua 1:8; Nehemia 8:13-15; Psalm 1:2.

Na apostel Paulus e sori fa Kresten musu si den prenspari santa sani di sma ben skrifi: „Ala sani di sma skrifi fositen, ben skrifi fu leri wi wan sani, so taki a fasi fa wi e horidoro èn a trowstu di Gado Buku e gi, kan gi wi howpu.” Yu e leisi Bijbel doronomo fu sori taki yu abi warderi gi a buku disi?—Romesma 15:4.