Yesus—Fu san ede a dede?

YESUS ben sabi san a ben kan fruwakti. A ben frustan taki en libi no ben o makriki. A ben sabi taki sma ben o kiri en na wan ogri-ati fasi aladi a ben abi sowan 30 yari, èn a ben de srekasreka fu dede na a fasi dati.

Bijbel e sori o prenspari a dede fu Yesus de. Wan buku e taki dati Bijbel e taki sowan 175 leisi fu a dede fu Yesus na ini den Kresten Griki buku fu Bijbel, noso a Nyun Testamenti. Ma fu san ede Yesus ben musu nyan pina èn dede? Wi musu kon sabi disi fu di a dede fu Yesus kan abi furu krakti tapu wi libi.

San Yesus ben fruwakti

Na ini den lasti yari fu Yesus en libi, a ben warskow den disipel fu en difrenti leisi taki a ben o nyan pina èn dede te fu kaba. Di a ben de na pasi fu go na Yerusalem fu hori a lasti Paskafesa fu en, a taigi den 12 apostel fu en: „Sma o tyari a Manpikin fu libisma go na den edeman fu den priester èn na den leriman fu Wet, dan den o krutu en taki a musu dede, èn den o tyari en go na den trakondre sma; den o lafu en, den o spiti na en tapu, den o wipi en èn den o kiri en” (Markus 10:33, 34).a Fu san ede a ben de so seiker taki den sani disi ben o pasa nanga en?

Yesus ben sabi den furu profeititori na ini den Hebrew buku fu Bijbel di ben taki na fesi fa en libi ben o kon na wan kaba (Lukas 18:31-33). Luku wan tu fu den profeititori nanga den Bijbeltekst di e sori fa den profeititori dati kon tru.

San ben o pasa nanga a Mesias

• Den ben tori en gi 30 pisi solfru moni.​—SAKARIA 11:12; MATEYUS 26:14-16.

• Den ben naki en èn spiti na en tapu.​—YESAYA 50:6; MATEYUS 26:67; 27:26, 30.

• Den ben spikri en na wan postu.​—PSALM 22:16; MARKUS 15:24, 25.

• Den ben kosi en di a ben de na a postu.​—PSALM 22:7, 8; MATEYUS 27:39-43.

• Den kiri en ma den no broko nowan bonyo fu en.​—PSALM 34:20; YOHANES 19:33, 36.

Yesus meki den profeititori disi èn sosrefi furu trawan kon tru. A no kan taki na ensrefi meki ala den profeititori disi kon tru. Ala den profeititori di kon tru na ini Yesus e sori taki na Gado trutru seni en kon.b

Ma fu san ede Yesus ben musu nyan pina èn dede?

A dede fu Yesus abi fu du nanga tumusi prenspari afersi

Yesus ben sabi sortu prenspari afersi ben opo kon na ini a dyari fu Eden. Wan yeye di opo ensrefi teige Gado, ben kori Adam nanga Eva so taki den teki a bosroiti fu trangayesi Gado. Di a trowpaar disi opo densrefi teige Gado, dan na aksi opo kon efu Gado trutru e tiri na wan reti fasi. Di den sondu, dan na aksi opo kon tu efu iniwan libisma ben o man tan gi yesi na Gado te a e kisi tesi.​—Genesis 3:1-6; Yob 2:1-5.

Yesus gi a moro krin piki di iniwan sma ben kan gi. A sori taki Yehovah e tiri na wan reti fasi èn taki libisma man tan gi yesi na en awinsi san pasa. Fu di Yesus gi yesi dorodoro „te na dede, iya, a dede na wan pina-postu”, meki a sori taki Gado abi a reti fu tiri ala sani (Filipisma 2:8). Yesus sori tu taki wan libisma sondro sondu man tan gi yesi na Yehovah srefi efu a kisi den moro hebi tesi di de.

Yesus dede fu frulusu libisma

A profeiti Yesaya ben taki na fesi dati a pramisi Mesias ben o nyan pina èn dede so taki libisma man kisi pardon fu den sondu fu den (Yesaya 53:5, 10). Yesus ben frustan a sani disi bun èn a ben de klariklari fu „gi en sili leki wan lusu-paiman fu frulusu furu sma” (Mateyus 20:28). Fu di a gi en libi leki wan srakti-ofrandi, meki sondu libisma kisi na okasi fu abi wan bun matifasi nanga Yehovah èn den kan kisi frulusu fu sondu nanga dede. A dede fu Yesus gi wi na okasi fu kisi san Adam nanga Eva lasi. Iya, wi e kisi a howpu fu libi fu têgo na ini wan grontapu di bun dorodoro.c​—Openbaring 21:3, 4.

San yu kan du

Na ini den artikel disi wi ben luku san Bijbel e taki fu Yesus. Wi ben luku pe a komoto, fa a ben e libi, èn fu san ede a dede. Te wi sabi den tru tori dati fu Yesus, dan dati e yepi wi fu no abi wan fowtu denki fu en. Ma dati a no ala. Te wi e du den sani di wi leri, dan disi o tyari blesi kon, iya, wi o abi wan moro bun libi now èn têgo libi na ini a ten di e kon. Bijbel e taigi wi san wi musu du efu wi wani kisi den sortu blesi dati.

• Leri moro fu Yesus Krestes èn a frantwortu di a abi na ini den sani di Yehovah abi na prakseri fu du.​—YOHANES 17:3.

• Poti bribi na ini Yesus, fu di yu o sori na a fasi fa yu e libi taki yu teki en leki yu Frulusuman.​—YOHANES 3:36; TORI FU DEN APOSTEL 5:31.

Yehovah Kotoigi ben o breiti fu yepi fu kon sabi moro fu Yesus Krestes, a „wan-enkri Manpikin” fu Gado. Nanga yepi fu en wi kan kisi „têgo libi” leki blesi.​—Yohanes 3:16.