2 Gado no e broko en ede trutru nanga wi—A sani dati tru?
Kande yu yere sma e taki: „Efu trutru Gado ben e broko en ede nanga libisma, dan a ben o tyari wan kaba kon na a ogridu nanga a pina di de na grontapu. Ma awansi a e broko en ede nanga libisma, toku mi feni taki a no e broko en ede nanga mi.”
San Bijbel e leri wi: Yehovah Gado no e meki taki ogridu de (Yakobus 1:13). Aladi a kan puru ogridu iniwan yuru, toku a e gi pasi taki a kruka sistema disi e tan fu wan pisi ten. Na so libisma ben o man kisi piki tapu den aksi di ben opo kon na a bigin di Gado meki libisma. Te fu kaba, a o puru libisma na ini a situwâsi disi, fu di a o tyari wan kaba kon na ala den problema di e miti den. Den problema disi kon fu di sma weigri fu saka densrefi na ondro a tiri fu En.—Genesis 3:1-6; Yesaya 65:17.a
Boiti taki Gado e broko en ede nanga ala libisma, a e sori tu taki a lobi ibriwan fu wi trutru. Mateyus 10:29-31 e sori taki a sabi sani fu wi di wisrefi no sabi. Drape skrifi: „Sma e seri tu pikin fowru gi wan sensi di no warti furu, a no so? Ma toku nowan fu den fowru o fadon na gron sondro fu un Tata sabi. A Tata teri srefi ala den wiwiri na tapu un ede. Fu dati ede no frede, bika unu warti moro leki wan heri ipi pikin fowru.”
A wini di a abi te yu sabi san tru: Nofo tron wi e wai pasi gi takru-ati sma noso gi sma di no e firi gi trawan. Dati meki a no e fruwondru wi taki furu sma di e bribi a lei taki Gado no e broko en ede nanga libisma, no wani kon sabi en kwetikweti. Boiti dati, den sma disi e suku yepi na en soso te den feni taki den no man tra fasi. Ma te yu sabi taki Yehovah Gado e broko en ede trutru nanga yu, dan dati kan gi yu deki-ati fu kon leri sabi en èn fu tron wan mati fu en.
Fu eksempre, kande yu begi Gado, ma yu e aksi yusrefi efu a ben e arki, noso efu a o piki a begi fu yu. Bijbel e gi wi a dyaranti taki „a sma di e arki begi” sa arki ala ten te wi e begi en nanga wan krin ati.—Psalm 65:2.
Gado e gi wi alamala a kari fu ’trowe ala wi hebi na en tapu, bika a e broko en ede nanga wi’ (1 Petrus 5:7). Wi kan de seiker taki a e broko en ede nanga wi srefi te bigi problema e miti wi, fu di a Wortu fu en e taki: „Yehovah de krosibei fu den sma di lasi-ati. A e frulusu den wan di brokosaka.”—Psalm 34:18.
[Futuwortu]
a Fu kon sabi moro fini fu san ede Gado e gi pasi taki ogridu nanga pina de, dan luku kapitel 11 fu a buku San Bijbel e leri wi trutru?
[Prenspari pisi na tapu bladzijde 5]
Efu Gado no e broko en ede nanga wi, dan fu san ede a e gi wi deki-ati fu taki nanga en na ini begi?