Kon krosibei na Gado
„Mi, Yehovah, na yu Gado di e grabu yu reti-anu hori”
„HORI mi anu”, na so wan papa e taigi a pikin boi fu en te den o abra wan strati pe furu wagi e pasa. Fu di a papa e hori a boi en anu steifi, meki a boi sabi taki noti no o pasa nanga en, èn taki a no abi fu frede. Oiti yu ben winsi taki wan sma hori yu anu tu fu yepi yu pasa den problema fu a libi? Efu dati de so, dan kande den wortu di Yesaya skrifi o de wan trowstu gi yu.—Leisi Yesaya 41:10, 13.
Den wortu fu Yesaya ben de gi a pipel fu Israel. Aladi Gado ben si a pipel dati leki en „spesrutu gudu”, toku furu feanti ben de na den lontu (Eksodes 19:5). Den Israelsma ben abi fu frede? We, Yehovah gebroiki Yesaya fu tyari wan boskopu gi den di ben musu trowstu den. Te wi e luku a boskopu dati, dan meki wi hori na prakseri taki den de tu gi den anbegiman fu Gado na ini a ten disi.—Romesma 15:4.
Yehovah e taigi den: „No frede” (vers 10). Yehovah no e taki den wortu disi fu soso. A e fruklari tu fu san ede a pipel fu en no abi fu frede. A e taki: „Bika mi de nanga yu.” A no de wan sma di de farawe fu wi èn di e pramisi fu kon yepi wi soso te wi de na nowtu. A wani a pipel fu en fu sabi taki a de nanga den, iya, neleki a de leti na den sei, èn a de srekasreka fu yepi den. A no de fu taki dati a sani disi de wan trowstu gi wi, a no so?
Yehovah e gi den anbegiman fu en a dyaranti disi tu: „No luku leki yu e frede” (vers 10). A Hebrew wortu di gebroiki dyaso kan abi fu du nanga sma di e „luku go na ala sei fu si efu wan sani de di kan du den ogri”. Yehovah e fruklari fu san ede a pipel fu en no abi fu luku lontu leki den e frede. A e taki: „Bika mi na yu Gado.” San kan trowstu sma moro leki dati? Yehovah na „a Moro Heiwan”, noso „na Almaktiwan” (Psalm 91:1). Efu sma abi na almakti Gado Yehovah leki a Gado fu den, dan den no abi fu frede, a no so?
We dan, san den anbegiman fu Yehovah kan fruwakti fu en? Gado e pramisi den: „Mi o hori yu nanga mi reti-anu fu retidu” (vers 10). A e taki tu: „Mi, Yehovah, na yu Gado di e grabu yu reti-anu hori” (vers 13). San yu e denki te yu e leisi den wortu dati? Wan buku e taki: „Te wi e luku den tu vers disi, dan wi e si wan moi eksempre fu wan papa nanga en pikin. A no de so nomo taki a papa o kibri a pikin gi ogri te dati de fanowdu, ma a de tu na a pikin en sei. A o sorgu taki noti no e kon na mindri en nanga a pikin.” Denki a tori, Yehovah no o gi pasi taki wan sani kon na mindri en nanga a pipel fu en, srefi na ini a moro muilek ten fu den libi.—Hebrewsma 13:5, 6.
Na ini a ten disi, den anbegiman fu Yehovah kan kisi furu trowstu fu den wortu di Yesaya skrifi. Na ini den „muilek ten disi di tranga fu pasa”, a kan taki den problema fu a libi e kon furu gi wi (2 Timoteyus 3:1). Ma wi no abi fu pasa den problema dati wi wawan. Yehovah de klariklari fu grabu wi anu hori. Neleki pikin wi kan tan hori den makti anu fu Gado, èn wi kan abi a frutrow taki a o tyari wi na a yoisti pasi èn taki a o yepi wi te wi de na nowtu.—Psalm 63:7, 8.
A bun fu leisi a pisi disi fu bijbel na ini yanuari: