Wi mag poti aksi gi Gado?

SON sma feni taki a no bun fu poti aksi gi Gado. Kande den feni taki wan sma no e sori lespeki gi Gado te a e aksi Gado fu san ede a e du son sani noso fu san ede a e meki son sani pasa. Na so yu e denki fu a tori tu?

Efu na so yu e si en, dan kande yu sa fruwondru fu sabi taki furu bun sma ben poti aksi gi Gado. Luku wan tu aksi di den ben poti gi Gado:

A reti-ati man Yob ben aksi: „Fu san ede den ogri sma e tan na libi? Fu san ede den e libi teleki den kon owru èn fu san ede den gudu moro trawan?”​—Yob 21:7.

A reti-ati profeiti Habakuk ben aksi: „Fu san ede yu e tan luku den sma di e bedrigi trawan? Fu san ede yu e tan pî te wan ogri sma e swari wan sma di bun moro en?”​—Habakuk 1:13.

Yesus Krestes ben aksi: „Mi Gado, mi Gado, fu san ede yu gowe libi mi?”​—Mateyus 27:46.

Efu yu e leisi den tra vers fu den kapitel dati, dan yu o si taki Yehovaha Gado no ben ati bron di den sma disi ben poti den aksi disi gi en nanga wan krin ati. A no e fruwondru wi taki Gado e gi pasi taki sma e poti aksi gi en. Fu eksempre, Gado no e mandi te wi e aksi en sani di wi abi fanowdu fu tan gosontu. Nanga prisiri a e gi wi san wi abi fanowdu (Mateyus 6:11, 33). A de klariklari fu gi wi piki di o meki taki wi frustan sani moro bun èn di o meki wi firi moro bun (Filipisma 4:6, 7). Srefi Yesus ben taigi den disipel fu en: „Tan aksi, dan unu o kisi” (Mateyus 7:7). Den tra vers fu a kapitel disi e sori taki Yesus no ben taki wawan fu sani di wi abi fanowdu fu tan na libi, ma a ben taki sosrefi fu den prenspari aksi di sma abi.

Efu yu ben abi na okasi, dan sortuwan fu den aksi disi yu ben o poti gi Gado?

• Fu san ede mi de na libi?

• San o pasa nanga mi te mi dede?

• Fu san ede yu e gi pasi taki mi e pina?

Fu di „na Gado srefi ben meki sma skrifi ala den sani di de na ini Gado Buku”, meki yu sa feni den piki fu Gado na ini en Wortu, Bijbel (2 Timoteyus 3:16). Luku fu san ede son sma poti den aksi di wi kari, èn luku fa Bijbel e piki den aksi disi.