Fu san ede Gado ben seni Yesus kon na grontapu?

1. Pe Yesus ben de fosi Gado seni en kon na grontapu?

Fosi Yesus gebore na ini Betlehem, a ben e libi leki wan yeye na hemel. A ben de a fosi sma di Gado meki èn sosrefi a wan-enkri sma di Gado srefi meki. Dati meki a fiti taki Bijbel e kari en a wan-enkri Manpikin fu Gado. Di a ben de na hemel, dan nofo tron a ben de a takiman fu Gado. Fu dati ede Bijbel e kari en a Wortu. A yepi Gado tu fu meki ala tra sani (Yohanes 1:2, 3, 14). Fosi Gado meki libisma, Yesus ben e libi milyunmilyun yari na hemel makandra nanga Gado.​—Leisi Mika 5:2; Yohanes 17:5.

2. Fa Gado seni en Manpikin kon na grontapu?

Nanga yepi fu en santa yeye Yehovah ben teki a libi fu Yesus puru na hemel èn a poti en na ini a muru fu Maria. Na so Yesus gebore, sondro taki wan man ben abi fu didon na en mama. Engel kon na wan tu skapuman di ben e tan na dorosei te neti fu luku den skapu fu den, èn den gi den a boskopu taki Yesus gebore (Lukas 2:8-12). Sobun, Yesus no gebore na ini a moro kowru pisi ten fu a yari, ma a kan taki a gebore na a bigin fu oktober, na a ten di a weer ben waran ete. Wan pisi ten baka dati, Maria nanga en masra, Yosef, teki Yesus tyari go na Nasaret pe den ben e tan, èn drape den kweki en. Yosef sorgu Yesus leki en kwekipikin.​—Leisi Mateyus 1:18-23.

Di Yesus ben abi sowan 30 yari, dan a teki dopu, èn Gado meki bekènti na fesi tra sma taki Yesus na en Manpikin. Ne Yesus bigin nanga a wroko di Gado ben seni en fu kon du.​—Leisi Mateyus 3:16, 17.

3. Fu san ede Gado ben seni Yesus kon na grontapu?

Gado ben seni Yesus kon na grontapu fu leri sma san tru. Yesus fruteri sma fu a Kownukondre fu Gado, wan tirimakti na hemel di o tyari freide kon na heri grontapu. A gi den a howpu fu têgo libi (Yohanes 4:14; 18:36, 37). Yesus leri sma furu sani tu di ben o yepi den fu feni trutru koloku (Mateyus 5:3; 6:19-21). Sma ben kan leri sani te den ben e luku fa a ben e tyari ensrefi. Fu eksempre, a ben e sori sma fa fu du a wani fu Gado srefi na ini muilek situwâsi. Te sma ben e du ogri nanga en, dan a no ben e pai ogri nanga ogri.​—Leisi 1 Petrus 2:21-24.

Yesus leri den bakaman fu en fu sori trutru lobi gi makandra. A ben abi furu grani di a ben e libi nanga en Papa na hemel, ma toku a sori sakafasi èn a kon na grontapu fu libi na mindri libisma, soleki fa en Papa ben wani. Nowan sma, boiti Yesus, ben kan sori wi moro bun fa fu sori lobi.​—Leisi Yohanes 15:12, 13; Filipisma 2:5-8.

4. San a dede fu Yesus wani taki gi wi?

Gado ben seni Yesus tu fu dede gi den sondu fu wi (Yohanes 3:16). Wi alamala na sondu sma. Disi wani taki dati wi abi swakifasi èn taki wi e prakseri fu du sondu. Dati meki wi e siki èn wi e dede. Tra fasi leki wi, a fosi man, Adam, no ben abi sondu. Disi ben o meki taki noiti a ben o dede èn noiti a ben o siki tu. Ma a kisi sondu di a trangayesi Gado. Leki bakapikin fu Adam, wi kisi sondu nanga dede fu en.​—Leisi Romesma 5:12; 6:23.

Fu di Yesus no ben abi sondu, meki a no dede gi sondu di ensrefi du. A dede gi den sondu fu wi. A dede fu Yesus meki taki wi man kisi têgo libi nanga blesi fu Gado.​—Leisi 1 Petrus 3:18.