Yehovah e blesi den sma di e gi sani nanga den heri ati
A MEKIMAN fu wi gi libisma a grani fu teki den eigi bosroiti. A e blesi den wan di no e gebroiki a grani dati nomo fu du den eigi sani, ma fu meki a tru anbegi go na fesi. Den sma disi e du ala san den man fu santa Yehovah en nen èn fu horibaka gi den sani di a o du fu meki en prakseri kon tru. Yehovah no wani taki wi e dini en nomo fu di wi musu. Ma a e prisiri trutru te wi e gi yesi na en fu di wi lobi en èn fu di wi e warderi en.
Fu eksempre, di den Israelsma ben de na ini Sinai-sabana, Yehovah taigi den fu bow wan presi pe den ben kan anbegi en. A taki: „Un tyari sani kon gi Yehovah. Meki ibri sma di wani, tyari sani gi Yehovah” (Eks. 35:5). Ibri Israelsma ben kan gi iniwan sani di a ben man gi. Ala san a ben firi fu gi, awinsi san dati ben de noso omeni dati ben de, a ben kan gebroiki na wan fasi di fiti fu du a wani fu Gado. San den Israelsma du di Gado aksi den a sani disi?
’Ibriwan sma di ben wani gi, tyari sani gi Yehovah nanga en heri ati. Ala sma tan tyari ala sani di den ben wani gi.’ Mansma nanga umasma ben de klariklari fu tyari wan sani kon fu du a wroko fu Yehovah. Den sani dati ben de moimoi pina, yesilinga, tra sortu linga, gowtu, solfru, kopro, blaw titei, skapu-wiwiri di ferfi kon redi, redi titei, fini linnen, krabita-wiwiri, skapububa di ferfi kon redi, sedagu-buba, akasia-udu, diriston, balsem-oli, nanga tra sortu oli. Te fu kaba, „den sani di den ben tyari, ben nofo fu du ala wroko di ben musu du, iya, den ben tyari moro leki dati srefi”.—Eks. 35:21-24, 27-29; 36:7.
Den sani di sma ben e tyari kon gi Yehovah meki taki a ben e prisiri. Ma san ben e gi en moro prisiri na taki den ben de klariklari fu horibaka gi a tru anbegi. Den ben de klariklari tu fu gi den ten nanga den krakti fu du a wroko fu en. Bijbel e taki: „Ala den uma di ben abi a koni fu meki sani, meki titei.” Iya, „ala den uma di sabi meki sani, ben meki titei fu krabita-wiwiri”. Boiti dati, Yehovah meki taki Besaleyel ’kisi koni, taki a ben man frustan sani èn taki a ben man sabi fa fu du ibri sortu wroko’. Fu taki en leti, Gado gi Besaleyel nanga Oholiab en yeye so taki den ben man du ala a wroko di den kisi fu du.—Eks. 35:25, 26, 30-35.
Di Yehovah aksi den Israelsma fu gi wan sani, a ben de seiker taki ’ibri sma di wani’ ben o horibaka gi a tru anbegi nanga en heri ati. Dati meki a yepi ala den sma dati èn a gi den furu prisiri. Na a fasi dati a blesi den. Sobun, te Yehovah e blesi den futuboi di de klariklari fu gi, dan a kan gi den koni èn ala san den abi fanowdu fu du a wani fu en (Ps. 34:9). Te yu e dini Yehovah nanga yu heri ati, dan yu kan de seiker taki a o blesi yu.