TORI FU A KAFTI | YU KAN FRUSTAN BIJBEL
Fu san ede a bun fu sabi san skrifi na ini Bijbel?
„Bijbel na wan kerkibuku di furu sma sabi. Ma a de wan buku fu trakondre sma. A no meki gi Sneisi.”—LIN, CHINA.
„Srefi den santa buku fu a Hindu bribi fu mi, mi no man frustan. Dan fa mi o frustan a Santa Bijbel?”—AMIT, INDIA.
„Mi abi lespeki gi Bijbel fu di a de wan owru buku èn mi yere taki a buku disi seri moro leki iniwan tra buku. Ma noiti mi srefi si wan Bijbel.”—YUMIKO, YAPAN.
Sma na heri grontapu abi furu lespeki gi Bijbel. Ma kande den no sabi so furu fu a buku disi, noso kande den no sabi srefisrefi san skrifi na ini. Na so a de nanga milyunmilyun sma na ini Asia, ma sosrefi na ini kondre pe bun furu sma abi wan Bijbel.
Kande yu e aksi yusrefi: ’Fu san ede mi musu kon sabi san skrifi na ini Bijbel?’ Te yu kon frustan den sani di skrifi na ini Bijbel, dan yu o kisi wini na den fasi disi:
Yu o de koloku
Yu o sabi san fu du te problema de na ini yu osofamiri
Yu o sabi san yu kan du te yu abi broko-ede
Yu o man libi moro bun nanga tra sma
Yu o sabi fa fu gebroiki yu moni na wan bun fasi
Luku na eksempre fu Yoshiko di e libi na ini Yapan. A ben aksi ensrefi san Bijbel e taki. Dati meki a bosroiti fu leisi en. San ben de a bakapisi? „Bijbel yepi mi fu si san na a moro bun fasi fu libi èn a meki taki mi abi wan howpu now”, na so Yoshiko taki. A taki tu: „Mi no e firi moro leki mi e libi fu soso.” Amit, di wi kari na a bigin fu na artikel, bosroiti fu studeri Bijbel en srefi. A taki: „Noiti mi no ben denki taki Bijbel abi so furu bun rai di kan yepi ala sma.”
Bijbel kenki a libi fu milyunmilyun sma. Wi e gi yu deki-ati fu ondrosuku san Bijbel e taki, dan yu o si fa yu srefi kan kisi wini fu en.