Yu ben sabi a sani disi?

Yesus ben abi leti fu kari den man di ben e seri meti na ini a tempel na Yerusalem „fufuruman”?

SOLEKI fa na Evangelietori fu Mateyus e sori, dan „Yesus go na ini a tempel èn a yagi ala den sma go na dorosei di ben e seri èn ben e bai sani na ini a tempel. A drai den tafra tapu fu den sma di ben e broko moni èn den bangi fu den sma di ben e seri doifi. A taigi den: ’Gado Buku taki: „Sma o kari mi oso, wan oso pe sma e kon begi”, ma unu e meki a kon tron wan presi pe fufuruman e tan.’”​—Mat. 21:12, 13.

Den Dyu Historia buku e sori taki den sma di ben e seri sani na ini a tempel ben e seri sani tumusi diri gi den sma di ben e kon bai sani na den. Fu eksempre, wan fu den buku dati di nen a Mishnah (Keritot 1:7) e taki dati wan ten ben de na ini a fosi yarihondro di sma ben musu pai wán gowtu denari gi tu doifi di den ben o tyari leki ofrandi. Wan sma ben musu wroko 25 dei fu man meki a moni dati. Pôtisma ben mag tyari doifi leki ofrandi. Ma srefi den doifi ben kon diri tumusi (Lef. 1:14; 5:7; 12:6-8). Rabbi Simeon Ben Gamaliyel no ben lobi a situwâsi disi. Di a bosroiti taki sma no ben abi fu tyari furu ofrandi moro, dan a prijs gi tu doifi saka bun furu.

Den sani disi e sori taki Yesus ben abi leti fu kari den sma di ben e seri sani na ini a tempel „fufuruman”, fu di den ben e bedrigi sma èn fu di den ben gridi.