Meki joe pikin tron discipel

¹ Jezus ben gi en bakaman a gebod: „Go foe dat’ede èn meki discipel foe sma foe ala naatsi, . . . èn leri den foe ondrow ala san mi ben taki gi joe” (Matt. 28:19, 20). Wan moro prenspari wroko no de. A de na ini a leri foe sma, sodati den e leri sabi Jehovah èn e go lobi èn dini en nanga den heri ati. Boiti dati, papa nanga mama abi na frantwortoe foe meki sosrefi toe den pikin tron discipel. — Ef. 6:4.

² Meki pikin tron discipel na wan sani pe foeroe de na ini. Wan foe den prenspari sani de, foe abi geregeld ala wiki wan osofamiribijbelstudi. Te wi e studeri nanga wan sma di abi belangstelling, dan wi e hori na sma di a de na prakseri èn wi e loekoe boen dati a no abi no wan prakseri di kan hori en jeje gro na baka. Wi e poti aksi gi en èn wi e arki boenboen na san a e piki, so dati wi sabi sortoe jeje dek’ati a abi fanowdoe. Papa nanga mama di e brok’ede nanga den pikin, sa poti prakseri moro boen na a denki foe den pikin èn a fasi fa den e si sani.

³ Papa nanga mama moesoe de na ai sodati den kan si ala mogelek firi foe drifi go na a grontapoe. Efoe wisrefi leki kristen bigisma moesoe loekoe boen nanga na kefar disi, omeni moro wi no moe overtoigi wisrefi dati oen pikin e go na fesi na ini na waarheid! Te pikin no e gi commentaar tapoe den konmakandra ofoe alaten e lési wan eenvoudig piki foe na paragraaf, dan den abi jepi fanowdoe foe den papa nanga mama. Te a osofamiri e studeri, meki den teki paragraaf tapoe san den wani gi commentaar èn jepi den foe sreka na piki nanga den égi wortoe. Te joe e poti suggestieve aksi, dan joe kan jepi den foe redeneer abra bijbelafersi. Ferteri den boen foe Jehovah en boenfasi èn en lobi èn foe a troe tori dati na ini ala sani den moesoe gi en frantwortoe. — Odo 1:7.

⁴ Ala dé tapoe skoro wan pikin e kon tanapoe na fesi njoen fasi foe si sani, te den e kisi les èn sosrefi toe na ini den demakandra nanga tra skoropikin. No ala den fasi disi foe si sani boen. Foe di a no abi ondrofeni meki wan pikin kan teki fowtoe waarde, èn safrisafri a jeje foe na grontapoe kan njan a jeje fundamenti di den papa nanga mama e proberi foe poti. Den papa nanga mama abi a wroko ala dé, foe kon sabi san prani na ini a ferstan foe den pikin, foe poeroe san de fowtoe èn poti na ini a presi foe disi den boen waarheid foe a Wortoe foe Gado. Disi e aksi foeroe boen èn dipi prakseri foe a sé foe den papa nanga mama, efoe den wani meki den pikin tron discipel. — 2 Kor. 10:4; Ef. 6:10-18; 1 Petr. 5:8.

⁵ Now di joe pikin e go baka na skoro, joe sreka den nanga a jeje fetikrosi di den abi fanowdoe foe „kan kiri ala den faja projectiel foe a ogriwan”? (Ef. 6:16). Den abi wan boen sabi foe den fundamenteel stré-aksi nanga san kande den sa abi foe doe, soleki kristen neutraliteit, na afersi foe taki odi na a fraga, fésti dé èn evolutie, sodati den kan gi wan krin èn logis bodoi? Foe di den e kon bigi dé foe dé, joe e sreka den na tapoe a teki foe wan joisti bosroiti na ini a tori foe takroe demakandra, a meki foe mofo, drugs nanga seksueel morsoelibi? A no sa de makriki, ma nanga boen foeroe moeiti, joe sa man foe jepi den na ini den skorojari foe gro na jejefasi. — Fil. 4:13.

⁶ Poti froekoe kaba theocratis marki gi joe pikin — gewoon pionierwroko, Betheldiniwroko ofoe spesroetoe pionierwroko. Gi joe pikin dek’ati foe tanapoe na ini a jepi-pionierwroko na ini den skoro fakansi. Fa Hanna ben de kolokoe nanga den foeroe blesi di a ben e kisi foe Jehovah, foe di a ben gi en fosi gebore pikin foe doe diniwroko gi Jehovah (1 Sam. 2:18-21). Na ini a ten disi foeroe theocratis papa nanga mama e abi a prisiri foe si dati wan ofoe moro foe den pikin e doe getrow diniwroko na ini wan ofoe tra pisi foe a foeroe-ten-diniwroko. Den sabi dati disi no de soso wan kibri gi den pikin, ma a de ooktoe wan meki kon regtvaardiki foe Gado nen. Jehovah e gi foeroe blesi na den wan di e dini en nanga den heri ati (Odo 10:22). Ala papa nanga mama di e gi den pikin dek’ati foe waka na baka a rai foe Jezus foe poti den kownoekondre-afersi na a fosi presi, e sori dati den koni. — Matt. 6:33.

⁷ Wan foe den moro boen maniri foe leri wan pikin, na foe gi na eksempre. Wortoe di no e akroederi nanga doe no abi wan krakti di e tan na tapoe wan pikin. Wan pikin e waka spesroetoe na baka na eksempre foe en papa nanga mama. Te joe e gi en dek’ati foe poti den kownoekondre-afersi na tapoe a fosi presi èn te joe wani dati a moesoe abi wan boen bewégi foe ati, dan joe moesoe meki dati kon foe si na ini joe fasi foe doe. Efoe a pikin e kisi dek’ati foe go pionier, dan den papa nanga mama moesoe si a velddienst leki wan serjoesoe sani, foe di den e doe someni leki den kan doe redelek èn efoe a de mogelek foe go ten na ten na ini a jepi-pionierwroko. Toe markitiki foe a fasi fa joe e tjari joesrefi nanga fa joe e taki no kan de, wan gi na komakandrapresi èn wán gi oso.

⁸ Na osofamiristudi moesoe de wan serjoesoe sani èn a no moe de so taki na foe di a kon so, dati wani taki, dati den e studeri makandra soso te no wan tra sani no de foe doe. Papa nanga mama di e span densrefi krakti foe de wan boen eksempre èn foe meki den pikin tron discipel akroederi nanga dati, e firi a prisiri foe si den e gro na ini na organisaatsi foe Jehovah.

⁹ Na ini den laatste dé disi a de gi papa nanga mama troetroe wan tjalansi foe meki wan osofamiri gro na ini waarheid. Disi de troetroe „kritiek ten di moeilek foe psa” (2 Tim. 1:1-5). Wi e si dati na grontapoe e wroko tranga foe kwinsi oen pikin go na ini a vorm foe en. Wi sabi taki den di seti densrefi na ini grontapoe, Jehovah sa koti den poeroe (Rom. 1:28-32). Foe dat’ede meki a de wan toemsi prenspari sani foe span oensrefi krakti foe meki oen pikin tron discipel, neleki fa wi e wroko tranga foe jepi tra sma na wi sé foe kisi a prijs, foe graboe a „libi foe now nanga a di moe kon”. — 1 Tim. 4:8b.