Brifi foe Bethel

Lobi brada nanga sisa,

A e gi oenoe bigi prisiri foe skrifi oenoe a brifi disi èn foe gi oenoe wantoe bodoi foe na wroko ini Sranan. Foeroe punt taki kaba na tapoe na congres ma wi wani sote foe go pikinso moro dipi na ini a tori.

A wroko na ini Sranan ben go heri boen na fesi èn a no kan tra fasi dati wi tangi e go foe disi na a bigi Giman foe ala boen sani èn na en kownoe Manpikin. Ma na loyaal fasi fa oenoe ben gi jepi wi no mag foe loekoe psa en. Na ini a tori disi wi e denki speciaal na a wroko di doe na ini na boeskondre. Oenoe sabi taki na ini ala den groepoe di de aparti foe wan gemeente sowan 100 prékiman de vertegenwoordigd? Èn dan wi no moe frigiti na wroko foe den speciale pionier foe wi, di panja na ala sé e doe nofotron heri tranga ma boen wroko. Foe wi kan gi wan overzicht foe wi speciale pionier wi kan ferteri san e kon now: dri e wroko na Godo Olo nanga kontren drape a Tapanahony liba; wán e wroko na Jawsa na Tapanahony liba toe; toe na Benanoe nanga kontren; dri na Skientabiki nanga kontren; dri na tapoe na Lawa èn féfi na Opo-Srananliba. Den oso pe den e tan no de so boen nofotron èn a fasi foe waka na liba de wan bigi problema, ma den e wroko tranga èn den bakapisi e gi prisiri. Na ini den district toe na wroko e gro tranga. Na ini Nickerie foeroe geïnteresseerde Ingrisi sma de èn den komakandra drape na ini Ingrisi-tongo e kisi net someni sma leki den di de ini Bakratongo. Ini Wageningen sowan 40 prékiman e préki geregeld èn ini Apoera nanga Orealla (na a abrasé foe na Corantijn liba na Guyana kontren) ala moen négi prékiman de bezig foe préki a boen njoensoe. Soleki fa oenoe sabi, dan na ini Wageningen nanga Apoera wi abi zendeling.

Na Ingrisi gemeente ini foto abi now sowan 40 prékiman èn nofotron moro leki 100 sma e fisiti den komakandra. Dati wani taki soboen boen howpoe tapoe moro prékiman.

Te oenoe e behandel a brifi disi, oenoe ben fisiti den congres kaba èn oenoe ben njan boen foe na leri di ben gi. A no kan tra fasi dati ini a moen disi september wi sa wani foe doe den sani san wi ben leri kaba. Den difrenti bodoi di e go foe na ten di de na wi fesi di ben gi ini na kriboi lezing, sondro degedege sa foeroe oenoe ati nanga faja. Meki a de so taki Jehovah blesi ala wi moeiti di wi e doe ini a jari di e kon, nanga di wi e doe ala san wi kan foe doro den marki. Foeroe okasi de ete foe go na fesi na a sé foe geregeldheid ini a dienst, na gewone pionierdienst nanga a jepi pionierdienst, na opo foe bijbelstudie èn na tjari foe sma kon na na organisaatsi. Meki Jehovah blesi kon na oenoe tapoe,

Oenoe brada na Bethel