Pristeri a boen njoensoe — Leki Pionier
1 Fositen a wortoe „pionier” ben abi foe doe nanga wan sani foe sroedati. A ben sori tapoe wan sma di koni kefarlek ini a tori foe sroedati-afersi, wan sma di e hari go na fesi a legre srefi, foe bow broki, strati nanga gotro foe kibri èn waka na ini te den feanti e soetoe na joe tapoe. Srefi now ete a wortoe „pionier” e meki sma e prakseri wan sma di e doe wroko tapoe wan spesroetoe kontren di noiti sma ben doe ete na fesi, wan sma di no e kikbak gi noti èn e hari go na fesi te leki a doro en marki. A de wan moi sani foe taki dati Webster’s Third New International Dictionary e gi leki wan definitie foe a wortoe „pionier”: „Wan foeroeten-bedinari foe den Jehovah Kotoigi”.
2 Jesus ben doe njoen sani ini a tori foe libi nanga froeloesoe. So leki a Revised Standard Version e taki, dan nanga leti den e taki toe foe en na ini Hebrewsma 12:2, leki „a pionier [archègos]. . .foe oen bribi”. Sondro foe weri a ben preiki a boen njoensoe foe a kownoekondre. Foe tjari a wroko di en Tata ben gi en foe doe, kon na wan kaba, ben de leki „njanjan” gi en (Joh 4:6, 34). Wi kan waka moro krosibei baka na Model foe wi foe di wi so srefi e dini leki wan pionier di abi deki-ati? — 1 Petr. 2:21.
3 Foeroe sma teki a blesi dienst disi na den tapoe. Tin jari pasa dan na ini wi kondre ala moen gemiddeld 22 gewoon pionier nanga 10 jepipionier ben gi raport. Na ini a dienstjari 1991 dan ala moen wan gemiddeld nomroe foe 119 gewoon pionier èn 99 jepipionier ben gi raport. Wan moi go na fesi, a no so? Sondro degedege, dan foeroe sma moro ete e angri foe doe moro ini a dienst. Soema na den sma di kan pionier?
4 Wan pionier na ini Japan ben taki: „Wan toe jari pasa foeroe foe wi ben denki dati soso den wan di ben de ini spesroetoe situwâsi, ben kan pionier. A gersi taki wi ben fowtoe ini a tori disi. Wi e kon sabi now taki soso den sma di de na ini spesroetoe situwâsi, no kan pionier.” Na Index 1986-1989 e sori, na tapoe bladzijde 180, go na den artikel pe eksempel skrifi foe jongoewan, mama, papa, sma di siki hebi nanga boen owroe sma, di de na ini a foeroetendienst. Disi e sori taki wi no moesoe prakseri toemoesi esi dati wi de ’ini spesroetoe situwâsi di e meki taki wi no man pionier’.
5 Ini wan tori na ini Na Waktitoren foe 15 november 1986 [Bakratongo], dan malengrisma e taki dati den boen bakapisi di den abi leki pionierdinari e kon foe dri sani: (1) positief tiri di wi e kisi foe Jehovah Gado nanga jepi foe en lobi organisâsi, (2) jepi di no e tan na baka foe na sei foe den osofamiri foe den èn memre foe a Kresten gemeente èn (3) wan opregti angri foe meki den dienstgrani foe den kon moro bigi. Den toe fosi penti abi foe doe nanga sani di trawan seti gi wi na fesi; a di foe dri penti abi foe doe nanga wi eigi boeweigi foe ati. Dati moesoe meki kon tranga kande?
6 Wi moesoe ’sori wan jeje foe òfer wisrefi gi trawan èn wi moesoe proberi foe broko a „skoto” foe wan makriki fasi foe libi’. Den wan di baka di den ondrosoekoe densrefi, ben kon na a bosroiti dati den ben moesoe gebroiki a rai dati na ini den libi èn di troetroe teki stap foe meki a dienst foe den kon moro bigi, de kolokoe èn aladei den e njanboen foe den prisiri ondrofenitori di den e miti ini a veld. Disi de ini akroederi nanga a prakseri di skrifi na ini den boekoe taki foe gi, so leki fa Jehovah e doe dati, e meki sma kolokoe. — 1 Tim. 1:11; Tori. 20:35.
7 Efoe wi ’lobi Jehovah nanga wi heri sili èn wi lobi a sma na wi sei leki wisrefi’ èn e doe moeiti foe proberi foe meki wi libi kon moro eenvoudig ete, dan seiker ete foeroefoeroe foe wi sa man dini leki jepi- ofoe gewoon pionier (Mat. 22:37-39). Èn den wan nanga ’spesroetoe situwâsi di e meki taki den no man pionier’, tokoe sa man ondrofeni na prisiri foe abi a pionierjeje èn foe horibaka gi den foeroetenwrokoman nanga den heri ati. Disi sa tjari froeloesoe gi wisrefi èn den wan di e arki wi, èn na a fosi presi a sa prisiri Jehovah ati. — 1 Tim. 4:16; Odo 27:11.