Krinfasi e gi Gado grani
1 A Wet foe Moses ben abi finifini markitiki na ini foe meki krinfasi de wan djaranti. Den markitiki disi ben poti Israèl aparti leki wan pipel di ben kisi wet foe hori densrefi krin na skinfasi èn na jejefasi (Lef. 11:35, 36; 15:1-11; Jes. 52:11). A krin fasi disi ben tjari grani gi Gado èn ben jepi a gosontoefasi foe a nâsi.
2 Ini a ten disi toe, krinfasi na wan marki foe kon sabi a pipel foe Jehovah. Ma ala di disi e meki sma kon sabi a pipel foe Jehovah leki groepoe, disi de troe dan gi ibriwan foe wi aparti? A fasi fa wi e broko wi ede foe hori sani krin èn foe de krin wisrefi, sa sori o foeroe wi e warderi den markitiki foe Jehovah.
3 Fa na oso foe wi e sori na dorosei? A e meki sma e wisiwasi a Kownoekondre boskopoe di wi e tjari? A kan taki sma e tweifri foe na opregtifasi foe wi efoe wi e taki foe kenki a grontapoe kon tron wan paradijs, ala di wi no e sorgoe boen gi wi eigi oso èn a grasi foe wi djari gro kon hei foe di wi no e koti en? Efoe na oso foe wi e sori foe de broejabroeja noso tingi smeri de foe di wi no abi a gwenti foe hori sani krin, dan sma kan taki dan dati wi ben kweki „den fasi foe krinfasi di e fiti a njoen grontapoe na ondro Gado Kownoekondre”? — om blz. 131-132 (Bakratongo).
4 Fa a de nanga na oto di wi e gebroiki gi a velddienst? A krin nofo, inisei nanga dorosei, so taki a fasi fa a e sori no e meki sma e wisiwasi a preikiwroko foe wi? Fa a de nanga den krosi di wi e weri, wi boekoetas èn a fasi fa wi e sorgoe gi wi srefi? Den krin èn den de warti foe weri, meki no wan sma abi reide foe kragi? A boen foe hori wisrefi èn den krosi foe wi krin, foe di wi e wasi wisrefi nanga wi krosi doronomo. — wSR89 1/6 blz. 27-32.
5 Ma san efoe wan brada kon abi wan mi-no-ke fasi so taki en persoonlijk krinfasi noso den sani foe en ini en birti e tjari sjen kon tapoe a gemeente? Kande a abi soso pikinso jepi fanowdoe di gi na wan switi fasi, foe di a owroe kaba noso foe di a swaki na skinfasi. Efoe dati de so, dan a ben sa de wan boen sani foe jepi en. Kande wan sma abi a problema sondro foe a sabi dati srefi; froemane di gi na wan switi fasi kande sa meki taki a kenki a situwâsi. Sma di e tan gi wan takroe eksempre ini a tori disi, no sa de warti foe kisi bigi grani ini a gemeente. A no de foe taki, dati den owroeman moesoe loekoe boen foe no poti den eigi markitiki noso den sani di den feni moro boen, leki wet.
6 Njoen sma di abi belangstelling e kisi a kari foe njanboen foe den jeje fesa na wi Kownoekondrezaal. Moro foeroe wi de fajafaja foe gi sma kari foe di a zaal de so moi èn krin. Ma wroko de fanowdoe foe hori en na a fasi dati. Loekoe lontoe na joe zaal. Den stoeroe, a gron, nanga den seiplanga krin? Joe e bosro den toilet doronomo? Te wi gwenti loekoe den doti fensre noso den doti stoeroe, dan esi-esi wi kan si dati leki wan gewoon sani. Ma kande den sani disi no e naki den ati foe freimde sma, di e fisiti foe a fositron, na wan boen fasi. Wi moesoe doe moeiti foe sorgoe gi wan zaal di e hari sma, foe di wi e teki prati te a ten doro foe krin a zaal noso foe meki a zaal loekoe boen baka.
7 Sondro foe wi taki wan wortoe, wi kan gi Jehovah grani nanga jepi foe a fasi fa wi e sori na dorosei èn nanga a krinfasi foe den oso foe wi, wi oto, nanga den Kownoekondrezaal foe wi. A boen eksempre di wi e poti, no sa gi no wan reide foe meki sma naki foetoe fadon, ma sa kotoigi taki na anbegi foe wi de krin èn opregti. — 1 Kor. 10:31, 32; Jak. 1:27.