’Kolokoe denwan de, di e jere a wortoe foe Gado’
1 Den wortoe foe Jesus di skrifi na tapoesei, di skrifi ini Lukas 11:28, e kroederi nanga a prakseri ini Openbaring 1:3. Ija, a jere di wan sma e jere den wortoe foe Jehovah, e tjari kolokoe kon èn te wan sma e arki den doronomo, dan dati sa tranga a winsi di a abi foe ondrow den.
2 Sma di no man si so boen, de grantangi srefisrefi gi den cassette di abi den bijbelboekoe, den poeblikâsi nanga drama na tapoe. Ma, foeroe trawan toe, di man leisi boen, de grantangi foe njanboen foe den cassette te den e sidon pî na wan presi, noso te den e rèis noso te den de na wroko, èn na so wan fasi, den e meki den wortoe foe Jehovah „saka go” moro dipi ini a froestan foe den. — Gal. 6:6a, NW, Stud.; foetoewortoe.
3 Joe e meki boen gebroiki foe a moi okasi disi? Ala den Griki Boekoe foe bijbel de foe kisi tapoe cassette. Arki den span evangelie tori foe Jesus en diniwroko, meki a gersi taki joe toe de na den span preiki waka foe den apostel, èn kisi wini foe den rai ini den brifi gi den fosi kresten gemeente. Nojaso, a boekoe Genesis foe den Hebrew Boekoe foe bijbel, de foe kisi toe. Wan oema di en ati ben firi tangi, ben skrifi foe na arki di a e arki den cassette: „A e gi so foeroe trowstoe, a e meki joe ati sidon èn a e gi korostoe, èn dati na wan sani di wi abi fanowdoe ini a ten pe wi e libi na ini.”
4 Bigisma, ma moro foeroe pikin-nengre, e njanboen èn e leri foe den drama. Joe ben sabi taki siksi drama ben kon na doro kaba tapoe cassette? Na wan fasi di e overtoigi wi, den e meki wi kon sabi den sani di pasa ini a libi foe Noah, Lot, Moses, Josua, Rakab, Josef, Jehu nanga foeroe tra sma foe bijbel.
5 Louise foe Ingrisikondre di abi seibi jari, ben moesoe tjari wan sani foe Egipti go na skoro. A ben tjari a cassette foe den „tin plaag” go na skoro. A skoromisi ben plèi a cassette gi ensrefi èn a ben naki en ati na so wan fasi, taki a ben seti sani foe meki ala den pikin kon na makandra tapoe ibri toedewroko, nanga a marki foe meki den pikin arki wan pisi foe a cassette èn baka dati foe taki makandra foe den plaag. Ala nanga ala, seibitenti skoropikin nanga dri skoromeester ben de na a demakandra disi. Now, den alamala sabi a nen foe Jehovah heri boen.
6 So srefi den aiti cassette nanga moi orkestra Kownoekondre pokoe, ben de tapoe ala momenti wan fonten foe trowstoe nanga wan fonten foe prisiri gi foeroe sma. Den cassette-opname foe bijbel boekoe, foe poeblikâsi, foe drama nanga foe pokoe, de wan pisi foe a lobifasi fa Jehovah nanga jepi foe en organisâsi, e sorgoe gi den sani di wi abi fanowdoe. Den e jepi wi foe de gosontoe na jejefasi èn taki wi de kolokoe. — 2 Petr. 1:2, 3.