Sortoe jeje joe e sori?
1 Paulus ben tapoe a brifi foe en gi a gemeente foe Filipi nanga a froemane disi: „A no-froedini boen-atifasi foe a Masra Jesus Krestes de nanga a jeje di joe e sori” (Fil. 4:23). A ben prèise den, foe di den ben abi opregti belangstelling foe preiki a boen njoensoe, ma so toe gi a broko di den ben broko den ede gi trawan na wan waran, lobi fasi. — Fil. 1:3-5; 4:15, 16.
2 A moesoe de na angri foe wi foe sori a srefi jeje ini wi gemeente. Te alamala e sori a faja, a switifasi, nanga a lobi di den lobi foe teki trawan na oso, dan disi e meki wan jeje kon, di trawan sa man foe si krinkrin toe. Wan positief nanga lobi jeje e tjari wánfasi èn a e meki sma go na fesi na jeje fasi (1 Kor. 1:10). Wan negatief jeje e meki sma lasi ati èn a e meki sma lasi a belangstelling nanga a faja foe den. — Openb. 3:15, 16.
3 Owroeman e teki fesi: Den owroeman abi wan frantiwortoe foe hori wan boen, positief jeje na mindri densrefi èn na ini a gemeente foe den. Foe san ede? Bika a fasi fa den e tjari densrefi, kan abi krakti na tapoe a gemeente. Wi e warderi en, taki wi abi owroeman di de fajafaja ini a velddienst, di e taigi wi odi nanga wan waran lafoe èn nanga wan switi wortoe, èn di de positief èn di e bow sma nanga rai di den e gi, awinsi den e gi disi persoonlijk noso foe a podium. — Heb. 13:7.
4 A no de foe taki, dati wi alamala moesoe meki taki a gemeente abi switifasi, de nanga faja, abi a lobi foe teki sma na oso, èn e prakseri sani na jeje fasi. Ibriwan foe wi aparti kan sori waran nanga lobi ini wi demakandra nanga trawan (1 Kor. 16:14). Wi no moesoe meki wan difrenti na mindri o owroe wan sma de, foe sortoe ras wan sma de, sortoe skoro wan sma kisi, noso na ekonomia situwâsi na mindri foe wi. (Teki gersi Efeisesma 2:21.) Bika foe a howpoe foe wi ede, wi kan sori wan jeje foe prisiri, a lobi di wi lobi teki trawan na oso troetroe, èn a de di wi de nanga faja ini a diniwroko. — Rom. 12:13; Kol. 3:22, 23.
5 Ala sma di abi demakandra nanga wi, so toe den njoenwan, moesoe firi taki wi wani dati den de nanga wi èn den moesoe firi a lobi nanga a gi di wi gi wisrefi abra na a bradafasi. Nanga wi diniwroko èn nanga a sori di wi e sori den moi kresten eigifasi, wi e boeweisi taki a gemeente de „wan pilaar nanga wan stonfoetoe foe a waarheid” (1 Tim. 3:15). Wi e ondrofeni seikerfasi na jeje fasi toe, nanga jepi foe „a vrede foe Gado” di e kibri wi ati nanga den krakti di e poti wi prakseri na wroko (Fil. 4:6, 7). Meki wi alamala doe fajafaja moeiti foe sori a sortoe jeje di sa gi wi a djaranti taki wi sa njanboen foe a no-froedini boen-atifasi foe Jehovah nanga jepi foe Masra Jesus Krestes. — 2 Tim. 4:22.