A fisiti foe konmakandra doronomo—toemoesi prenspari foe tanapoe kankan
1 Na apostel Paulus ben gi wi tranga foe tan „gosontoe na ini bribi” (Tit. 1:9,13). Tapoe den gemeente konmakandra wi e taki foe gosontoe prakseri èn e kisi rai fa foe tan weri wi heri fetisani so taki wi kan „tanapoe kankan teige den trikiwroko foe Didibri”.—Ef. 6:11; Fil. 4:8.
2 Den konmakandra e gi wi san wi abi fanowdoe: A fisiti foe gemeente konmakandra doronomo de toemoesi prenspari foe kan tanapoe kankan (1 Kor. 16:13). Tapoe den konmakandra wi e begi foe taki tangi èn foe prèise Gado, so srefi foe aksi en gi a boen foe a gemeente nanga den sani di a gemeente abi fanowdoe (Fil. 4:6, 7). Te wi e singi den Kownoekondre singi, dan dati e gi wi deki-ati, èn dati e meki wi man foe sori den firi foe wi te wi e anbegi Jehovah (Ef. 5:19, 20). A de di wi de makandra na a Kownoekondre zaal bifo èn baka den konmakandra e gi wi deki-ati, e bow wi, èn e gi wi kowroe ati.—1 Tes. 5:11.
3 April di pasa, tapoe wan krakti fasi a spesroetoe taki nanga a nen „A kaba foe falsi relisi de krosibei”, ben opo a froestan foe sma di lobi waarheid foe a prensparifasi foe handri wantewante foe komoto na Babilon a Bigiwan (Openb. 18:4). Na ini juni nanga juli a ben gi troetroe deki-ati foe doe den dri Waktitoren-studieartikel foe leti di skèin, di meki taki a pasi foe a regtfardikiwan kon moro krin (Odo 4:18). Prakseri san wi ben sa lasi efoe wi no ben sorgoe taki wi ben fisiti den konmakandra dati.
4 Na tapoe a „Prisiri Prèiseman” Distriktkongres foe wi, den ben poti krakti na tapoe a kisi di wi moesoe kisi leri foe meki wi diniwroko kon moro boen. Soleki fa Georganiseerd om onze bediening te volbrengen (Orga foe doe wi diniwroko) e sori tapoe bladzijde 75, a Theokrasia diniwroko skoro na wan sani di sreka foe gi leri doronomo gi a heri gemeente. Nownow, wan fasi foe a programa e jepi wi foe kon sabi a disiten historia foe na organisâsi moro boen, foe di wi e gebroiki a Verkondigers-boekoe. Wi no sa wani misi na okasi foe kisi a leri disi.
5 A Diniwroko-konmakandra foe wi e sreka wi foe kan abi moro boen bakapisi na ini a diniwroko. Disi wi ben si na tapoe a konmakandra pe wi ben kisi rai foe abi wan prati na ini a prati foe a Kownoekondre njoensoe nr. 34 na ala sei. A blèsi foe Jehovah ben foeroe pasamarki tapoe a wroko disi leki fa a ben sori na ini den toemoesi boen bakapisi di wi ben abi na heri grontapoe. (Teki gersi 2 Korentesma 9:6, 7.) Den wan di e fisiti den konmakandra doronomo ben kisi deki-ati èn den ben jepi foe horibaka gi a kotoigi-wroko.
6 Tapoe a Gemeente-boekoestudie a Moro Bigi man-boekoe e jepi wi foe froestan o prenspari a de foe poti prakseri tapoe a waka nanga a libi foe Jesus Krestes. Te wi e loekoe grontapoe nownow, dan wi e si den moro bigi kontroe foe sani di Jesus ben taki na fesi.
7 Poti a fisiti foe konmakandra doronomo tapoe a fosi presi: Na ini foeroe kondre, pe den brada foe wi e kisi tesi, den e froestan o prenspari a de foe kon makandra ibri wiki ete. Na ini Boeroendi, Rwanda, Liberia nanga Bosnia nanga Hersegofina, so foeroe njoen sma e fisiti den konmakandra taki den abi toe noso dri tron a nomroe foe preikiman na den konmakandra. Na tapoe a fasi disi Jehovah e jepi den brada foe tan kankan na ini wànfasi.—Fil. 1:27; Hebr. 10:23-25.
8 Iniwan sma di no ben sorgoe taki a ben fisiti den konmakandra doronomo, moesoe doe wan sani now foe kenki a gwenti dati ( Preik. 4:9-12). Foe man tanapoe kankan, wi abi demakandra nanga lepi sma fanowdoe foe kan gi makandra deki-ati, soleki fa wi e kisi dati te wi e fisiti den konmakandra doronomo.— Rom. 1:11.