Aksi boksoe

◼ Foe san wi moesoe loekoe boen na ini wi diniwroko te wi de nanga wan sma foe a tra geslakti?

Wi abi reide foe froewakti taki wi brada nanga sisa abi na prakseri foe hori faste na den moro hei moreel markitiki na ini a fasi fa den e tjari densrefi. Ma tokoe, wi e libi na ini wan doti grontapoe di e gi toemoesi foeroe primisi, èn di no abi foeroe moreel wet. Ala di wi abi den moro boen sani na prakseri, tokoe wi moesoe loekoe boen doronomo foe no tjari takroe nen noso taki wi go ini wan tori di no joisti. Disi wani taki dati wi moesoe de fersektiki te wi de na ini a diniwroko.

Na ini a velddienst nofotron wi e miti sma di de foe a tra geslakti, di soleki fa a gersi, e sori wan opregti belangstelling gi a waarheid. Te wi de wi wawan te wi tjari a fisiti èn no wan tra sma de na oso, dan moro foeroe a ben sa de a moro boen sani foe gi kotoigi na a doro na presi foe go na inisei. Efoe belangstelling de, dan sani kan seti foe go baka te wan tra preikiman sa de nanga wi noso te tra sma na ini na osofamiri sa de na oso toe. Efoe dati no man, dan a ben sa de wan koni sani foe meki wan preikiman di de foe a srefi geslakti leki na ososma, tjari a fisiti. Disi de so srefi te wi e hori bijbelstudie nanga wan sma di de foe a tra geslakti.​—Mat. 10:16.

Wi moesoe loekoe boen te wi e teki wan sma foe wroko nanga en na ini a diniwroko. Ala di preikiman di no de foe a srefi geslakti kan wroko nanga makandra son leisi, tokoe a ben kan de moro boen te den e doe disi nanga wan groepoe. Soleki fa a gwenti de, srefi te wi de na ini a diniwroko, a no ben sa de wan koni sani foe pasa ten nanga wan sma wawan di de foe a tra geslakti noso di no de wi trowpatna. Foe dati ede, a brada di abi a frantiwortoe gi a groepoe di e go na ini a diniwroko, moesoe gebroiki boen koni te a e meki preikiman, so srefi tini, wroko nanga makandra.

Te wi e gebroiki koni foe man si sani krin ala ten, dan wi no sa „gi no wan reide foe naki foetoe fadon” na wisrefi noso na tra sma.​—2 Kor. 6:3.