No meki joe anoe rostoe
1 San joe ben sa denki foe wan gronman di ibri leisi baka ben prani siri na tapoe a pisi gron leti sei en oso, ma noiti a ben go prani na tapoe a fatoe pisi gron di de moro fara? A de krin taki a ben sa kisi moro boen bakapisi efoe a ben proeberi foe prani na tapoe wan moro bigi pisi foe a gron foe en.
2 Tokoe son leisi a de so toe te wi e wroko a gebied. Kande wi e wroko son gebied foeroetron, ma tra gebied wi no e wroko kande. A troe, taki son gebied fara noso taki a moeilek foe doro drape, èn den kostoe di kon moro hei gi vervoer, kan de wan problema toe. A de so toe taki na ini son gebied wi abi moro bakapisi leki na ini tra gebied. (Teki gersi Mateus 13:3-8.) Ma tokoe wi wani gi ibriwan sma na okasi foe jere a „boen njoensoe” foe di wi e sai someni Kownoekondre siri leki wi man.
3 MORO MOEITI E DOE FOE WROKO GEBIED PE WI NO E WROKO SOMENI: Efoe joe gemeente abi gebied pe den no e wroko someni, dan joe kan aksi efoe wán foe den gebied disi kan tron wan gebied di joesrefi o wroko. Te joe e aksi disi dan dati kan jepi a gemeente foe wroko pisi foe a gebied pe den no e wroko someni.
4 Boiti dati, den owroeman foe den gemeente disi kan sreka sani di fiti foe meki groepoe gi kotoigi, so taki den kan wroko a gebied pe den no e wroko someni. Kande preikiman kan teki njanjan nanga den èn wroko wan heri dei na ini a gemeente gebied di de moro fara. Foe san ede joe no e poti en leki wan marki di joe wani doro a jari disi foe wroko den gebied disi someni leki joe man?
5 Efoe joe gemeente e wroko ala a gebied foe en doronomo, dan kande joe abi na okasi foe go jepi tra gemeente wan pisi ten, foe wroko a gebied foe den. Spesroetoe difrenti gemeente na boiti presi abi jepi fanowdoe foe wroko a gebied foe den. Son groepoe nanga osofamiri ben doe disi, èn den ben abi toemoesi boen bakapisi.
6 Foe san ede oenoe leki osofamiri no e sreka sani foe jepi wan gemeente foe wan tra birti wan satra nanga wan sonde, pe den e wroko a gebied foe den soso wán tron wan afoe jari? Na a fasi dati, joe leki papa èn leki edeman foe na osofamiri kan kweki a pionier jeje na ini den pikin foe joe. Boiti taki a heri osofamiri sa prisiri foe a switi demakandra nanga den brada nanga sisa èn foe a faja di den pionier foe a gemeente abi, den sa prisiri toe foe miti wan tra sortoe poebliki. Moro fara, joe kan gebroiki den moi okasi toe foe doe stratiwroko. Joe sa prati moro poeblikâsi leki na tra okasi. A no de foe taki, dati disi sa bow oenoe leki osofamiri te oenoe drai go baka na oso.
7 Moro de fanowdoe leki foe wroko ala a gebied foe wi. Wan tra sani pe wi moesoe poti prakseri na tapoe, na taki wi moesoe wroko na wan fasi di sa gi wi boen bakapisi. Wi si kaba omeni winimarki wi e kisi te wi e wroko nanga pikin groepoe foe 4-6 preikiman, soleki fa bladzijde 1 foe Onze Koninkrijksdienst foe oktober 1986 ben taki? A gebied sistema foe a gemeente kenki na so wan fasi taki nofo karta ben meki gi pikinpikin gebied? Wi kan gebroiki na okasi foe gi kotoigi na mofoneti moro boen, foe eksempre te wi e gebroiki a ten di de bifo a gemeente boekoestudie? So boen, den brada di abi a frantiwortoe, so srefi ala den preikiman, kan doe foeroe foe gi jesi moro boen na a komando foe ’meki a kownoekondre foe Gado bekènti na ala sei’.—Luk. 9:60.
8 ABI WAN PRATI NA A WROKO FOE SAI KOWNOEKONDRE SIRI: Noti no moesoe hori wi foe poti wi anoe na a ploegoe foe moro wroko di e doe, èn loekoe den sani di de na wi fesi (Luk. 9:62). Memre taki, wi no sabi foe pe a gro sa kon (Preik. 11:6). Foe dati ede, meki wi poti wisrefi leki wrokosani na ini na anoe foe Jehovah nanga na organisâsi foe en, neleki Filipus, èn de srekasreka foe sai Kownoekondre siri pe dati de fanowdoe, bifo a kaba e kon.—Tori. 8:26, 27; Mat. 28:20.
[Prenspari pisi na tapoe bladzijde 3]
Te wi e wroko na boitipresi, dan fa
◆ wi kan wroko a gebied moro boen?
◆ den wan di e wakti na ini oto, kan gebroiki a ten foe den na wan koni fasi?
◆ wi kan hori den wan di e wakti na ini oto, na prakseri?