Wi sa memre a dede foe Krestes na heri grontapoe
1 Jehovah gi wi foeroe presenti. Na wan moi fasi den e taki foe a bakapisi foe en boenfasi nanga en lobi boen-ati leki „a fri presenti foe en di pasa san wi man taki foe en”. Ija, a „no-froedini boen-ati foe Gado” de so moi, dati a pasa san wi man taki foe en.—2 Kor. 9:14, 15.
2 A moro bigi presenti foe en: Jesus Krestes, di de a Froeloesoeman foe a libisma famiri, na a moro bigi presenti di de. Foe sori taki a lobi a grontapoe foe libisma troetroe, dan Jehovah ben gi wi en lobi èn wan-enkri gebore Manpikin (Joh. 3:16). Wi moesoe memre so wan blesi foe Gado di wi no e froedini, na heri grontapoe. O ten èn fa? Na a mofoneti foe fodewroko 1 april 1999, kresten na heri grontapoe sa memre na Avondmaal foe Masra, èn den sa hori a Memrefesa foe a moro bigi ofrandi di de.—1 Kor. 11:20, 23-26.
3 Krestes dede gi wi „ala di wi ben de sondari ete”, èn wisrefi kan sori taki wi de nanga tangi te wi e hori a Memrefesa foe a dede foe en, èn te wi e kari trawan foe de drape makandra nanga wi na a toemoesi prenspari okasi dati.—Rom. 5:8.
4 A moro prenspari okasi: Na a fosi presi, a memre di wi e memre a dede foe Krestes e tjari kon na krin taki a ben hori a soevereiniteit foe Gado hei sondro foe misi wán leisi. A e memre wi toe taki wi kan kisi wan krin posisi na Jehovah, foe di wi e sori bribi na ini na ofrandi foe Jesus, èn na so fasi wi abi a djaranti taki wi sa kisi froeloesoe (Tori. 4:12). Foe troe, disi na a moro prenspari okasi foe a jari!
5 Wi e sori taki wi lobi den sma na wi sei efoe wi e kari den foe hori na Avondmaal foe Masra nanga wi. Den winimarki foe a loesoe-paiman de gi miljoenmiljoen sma di e leri foe a toemoesi bigi waarde di a abi (Fil. 3:8). Den wan di e sori bribi na ini na srakti-ofrandi foe Krestes, kan kisi a tranga howpoe foe têgo libi.—Johanes 17:3.
6 A ten foe a Memrefesa e gi wi spesroetoe okasi foe sori warderi gi a no-froedini boen-ati foe Gado, di e pasa ala sani. Disi na wan boen ten srefisrefi foe teki prati fajafaja na a wroko foe preiki a boen njoensoe foe Gado Kownoekondre. Bigi winimarki e wakti ala sma di e prakseri na ini begi foe Jehovah en fri presenti di pasa ala san wi man taki foe en, èn te den e seti sani foe kan de drape a jari disi te wi sa hori a fesa foe na Avondmaal foe Masra!